गैरआवासीय नेपाली संघ (एनआरएनए) अन्तर्राष्ट्रिय समन्वय परिषदको युरोप उप संयोजकमा तनहुँ डुम्रेका सुरेन्द्र प्रधानले उम्मेदवारी घोषणा गुर्न भएको छ । दुई दशकयता जर्मनीको ह्याम्बर्गलाई आधार बनाएर व्यवसायमा संलग्न प्रधानले जर्मनीमा एनआरएनएको स्थापनादेखि नै आवद्ध भएर काम गर्दै आइरहनु भएको छ ।
संस्थाको ह्याम्बर्ग शाखाको संयोजक हुँदै राष्ट्रिय समितिको प्रवक्ता तथा उपाध्यक्ष पदमा रहेर काम गरिससक्नु भएको छ । एनआरएनएको अन्तर्राष्ट्रिय समन्वय परिषद्मा जर्मनीका तर्फबाट सदस्य रहिसक्नु भएका प्रधानले यसपाली युरोपको उपसंयोजकको दावेदारी गर्दै उम्मेदवारी दिनु भएको हो । ‘लामो समय क्षेत्रीय शाखादेखि अन्तर्राष्ट्रिय समन्वय परिषद्मा रहेर काम गरिसकें,’ उहाँले भन्नु भयो, ‘अब समग्र युरोपका नेपालीहरुको समस्या समाधानमा भूमिका खेल्ने रहर छ ।’
एनआरएनए जर्मनीको स्थापनाकालदेखि नै सक्रिय प्रधान संस्थालाई विभिन्न क्षेत्रमा शाखा स्थापना गर्न र गतिविधि अघि बढाउन लागिरहेको उहाँलाई नजिकबाट चिन्ने व्यवसायी नारायणलाल श्रेष्ठ बताउँनुहुन्छ ।
हाल प्रधानले आफ्नै तथा नेपाली र जर्मन नागरिकसँग मिलेर विभिन्न भागमा व्यवसाय विस्तार गरिरहनु भएको छ । ह्यामबर्गमा दुई रेष्टुरेण्टका मालिक उहाँले फ्रयांकफटमा जर्मन नागरिकसँगको सहकार्यमा होटल खोल्ने तयारीमा हुनुहुन्छ । आफ्नो व्यवसायमा नेपालीलाई पनि रोजगारी प्रदान गरिरहनु भएका उहाँले युरोप बुझेकाले यसपाली उम्मेदवार बनेको बताउनुहुन्छ । ‘एनआरएनएका विभिन्न भूमिकामा रहँदा युरोपका साथीहरुको समस्या, नेपालमा लगानी आदिको बारेमा बुझेको अनुभव व्यवहारमा ल्याउने सोच छ,’ उहाँले भन्नु भयो,‘साथीहरुले विश्वास गरिदिनुभएमा म योजनामा सफल हुनेछु ।’
प्रधानले युरोपभरका नेपालीलाई स्वदेशमा लगानीको वातावरणका साथै नेपाल पर्यटन वर्ष सफल पार्न पनि भूमिका खेल्ने बताउनु भएको छ । ‘नेपालीहरुका समस्या पहिलो प्राथमिकता हुनेछ,’ उहाँले भन्नु भयो,‘सँगै देशमा लगानी र पर्यटन प्रवद्र्धनमा हामीले सकेको प्रयास गर्नेछौं ।’
प्रकाशित मिति: ५ आश्विन २०७६, आईतवार १९:२९
