सुर्खेत, १० असार । सुर्खेतको वीरेन्द्रनगर नगरपालिकाले आर्थिक वर्ष २०७५/०७६ को लागि सवा ९६ करोड बजेट सार्वजनिक गरेको छ । नगरपालिकाको तेस्रो नगरसभामा उपप्रमुख मोहनमाया ढकालले ९६ करोड २२ लाख ८३ हजारको बजेट प्रस्तुत गरेकी हुन् । प्रस्तुत बजेटमा दुई करोड ४८ लाखको घाटा बजेट रहेको छ ।
आन्तरिक आयतर्फ सात करोड ४० लाख ६० हजार र बाह्य स्रोततर्फ ८६ करोड ३४ लाख २३ गरी ९३ करोढ ७४ लाख ८३ हजार र खर्चतर्फको चालुमा ६२ करोड २२ लाख ३९ हजार तथा पूँजीगतमा ३४ करोड ४४ हजार गरी ९६ लाख २२ लाख ८३ हजारको बजेट प्रस्तुत गरिएको छ ।
नगरपालिकाले वित्तीय समानिकरण अनुदानमा २४ करोढ ५१ लाख १७ हजार, संघीय सरकारको राजश्व बाँडफाँटमार्फत १५ करोड तीन लाख १८ हजार, सशर्त अनुदान ३१ करोड २५ लाख ७० हजार, प्रदेशको राजश्व बाँडफाँटमार्फत १८ लाख ५१ हजार, प्रदेश सरकारको अनुदान ७७ लाख ३९ हजार, विशेष अनुदान १४ करोड चालीस लाख ११ हजार र अन्य अनुदान १८ लाख १७ हजार प्राप्त हुने उल्लेख गरेको छ । यस्ते खर्चमा विषयत शाखातर्फ ३१ करोड २५ लाख ७० हजार, नगर कार्यपालिका कार्यालयतर्फ १६ करोड ५६ लाख ५८ हजार र सामाजिक सुरक्षातर्फ १४ करोड ४० लाख ११ हजार रुपैयाँ छुट्याएको छ ।
नगरपालिकाले कृषि र पशुपालनलाई नगरको आर्थिक विकासको मूल आधार मानेको छ । नगरपालिकाले पूर्वाधार र सहरी विकास, सामािजक विकास, आर्थिक विकास, वातावरण तथा विपद्, संस्थागत विकास, सेवा प्रवाह र सुशासन विषयमा बजेट विनियोजन गरिएको छ ।
नगरपालिकाले नगरका वडा नं. ९, १०, १२, १३ र १४ लाई पर्यटकीय क्षेत्र, वडा नं. १०, १३, १४, १५ र १६ लाई पशुपालन तथा कृषिको पकेट क्षेत्रको रुपमा विकास गर्ने भएको छ ।
वीरेन्द्रनगर नगरपालिकाका प्रमुख देवकुमार सुवेदीले शैक्षिक, प्रशासनिक र पर्यटकीय सहर बनाउने योजना क्रमशः पूरा गर्दै जाने दावी गरे । उनले विगतका वर्षहरुमा गर्न नसकिएको कामलाई निरन्तरता दिइनेपनि जनाए ।
नगरसभामा बोल्ने वक्ताहरुले कर्णाली प्रदेशको राजधानी सुर्खेतको वीरेन्द्रनगरलाई अनुकरणीय बनाउन कार्ययोजनासहितको कामहरु गर्नुपर्नेमा जोड दिएका छन् । उनीहरुले जथाभावी जग्गा प्लटिङको कामलाई रोक लगाउनुपर्ने, नगरभित्रका पूर्वाधारका कामलाई प्राथमिकता दिनुपर्नेजस्ता सुझावहरु दिएका छन् । कर्णाली प्रदेशसभा सदस्यहरु यामलाल कँडेल, सीता नेपाली, यज्ञबहादुर विसी, राजु नेपाली, जिल्ला समन्वय समितिका प्रमुख छविलाल सिग्देललगायतले बोलेका थिए ।
प्रकाशित मिति: १० असार २०७५, आईतवार २१:२५
