मोरङ, २० वैशाख । साढे ३३ किलो सुन तस्करी प्रकरण र मोरङ उर्लाबारीका सनम शाक्यको हत्या आरोपमा ६३ जनाविरुद्ध जिल्ला अदालत मोरङमा मुद्दा दर्ता गराइएको छ ।
प्रहरीले बुझाएको अनुसन्धान प्रतिवेदनका आधारमा सरकारी वकिलको कार्यालयले फरार रहेका मुख्य अभियुक्त चुडामणि उप्रेती ‘गोरे’ सहित पक्राउ परेका २९ र अन्य फरार ३४ जनाविरुद्ध अपहरण, कर्तव्य ज्यान र संगठित अपराधमा वुधबार मुद्दा दर्ता गराएको हो ।
जिल्ला प्रहरी कार्यालय मोरङका अनुसार बहालवाला र पूर्व गरी ७ प्रहरी अधिकारी, तीन व्यापारी, सनम शाक्य हत्यामा जोडिएका ६ प्रतिवादी र विमानस्थलमा कार्यरत १३ प्रतिवादीविरुद्ध मुद्दा दर्ता गरिएको छ । पूर्वडीआईजी गोविन्द निरौला, एसपीद्वय विकासराज खनाल र दिवेश लोहनी, डीएसपीद्वय प्रजित केसी र सञ्जय राउत, सई बालकृष्ण सन्जेल तथा जवान विष्णुबहादुर खड्कालाई संगठित अपराध सम्वन्धि मुद्दा लगाइएको छ ।
बयान दिन गएका लोहनीलाई प्रहरीले आजै नियन्त्रणमा लिएको हो । कुनै पनि अभियोगमा यिित धेरै बहालवाला प्रहरी अधिकारीलाई प्रतिवादी बनाइएको पहिलो घटना हो । त्यसैगरी, प्रहरीको नियन्त्रणमा रहेका विमानस्थलका कर्मचारी, व्यापारी र सनम शाक्यको हत्याका आरोपित मोहन कार्की, एकराज मल्ल, नरेन्द्र कार्की, लाक्पा शेर्पा, माधव भनिने मोहन घिमिरेलाई प्रतिवादी बनाइएको छ ।
सुन गायब र हत्यामा प्रहरीकै मिलेमतो रहेको आशंकामा अनुसन्धानका लागि गृह मन्त्रालयले सहसचिव ईश्वर पौडेलको नेतृत्वमा छानविन समिति गठन गरेको छ । विमानस्थलबाट गत माघ ७ गते तस्करी भएको साढे ३३ किलो सुन हराएपछि तस्करीका ‘नाइके’ भनिएका चूडामणि उप्रेती ‘गोरे’नेतृत्वको समूहले फागुन १८ गते सनम शाक्यको हत्या गरेको थियो । शवलाई गायब बनाउन लैजाँदै गर्दा प्रहरीले विराटनगर–३ बाट फागुन १९ गते शाक्यको शव फेला पारेको थियो ।
प्रकाशित मिति: २० बैशाख २०७५, बिहीबार ०९:१०
