काठमाडाैँ,२० चैत । भूकम्प पीडितलाई दोस्रो किस्ताको अनुदान दिने म्याद असार मसान्तसम्म थपिएको छ ।
मंगलबार विहान प्रधानमन्त्री निवास बालुवाटारमा बसेको राष्ट्रिय पुनर्निर्माण प्राधिकरण निर्देशक समितिको १२ औं बैठकले भूकम्प पीडितलाई दोस्रो किस्ताको अनुदान दिने म्याद पुनः ३ महिना थप गर्ने निर्णय गरेको हो । चैत्र मसान्त भित्र दोस्रो किस्ताको अनुदान सबैले लिने अवस्था नरहेकाले त्यसको म्याद ३ महिना थप गर्ने निर्णय गरिएको प्राधिकरणका प्रमुख कार्यकारी अधिकृत युवराज भुसालले जानकारी दिए ।
बैठकले सेवाग्राहीलाई सहज हुने गरी कार्यविधि संशोधन गर्ने प्रस्ताव पनि स्विकृत गरेको छ । त्यसैगरी निजी आवास निर्माणको कामलाई पहिलो प्राथमिकतामा पनि राखिएको छ । त्यसपछि क्रमशः स्वास्थ्य, शिक्षा, पुरातात्विक र अन्य पूर्वाधारको कामलाई अघि बढाउने गरी कामको प्राथमिकता पनि निर्धारण गरिएको प्रमुख कार्यकारी अधिकृत भुसालले बताए । बैठकमा प्रधानमन्त्री एवम् समितिका अध्यक्ष केपी शर्मा ओलीले असहाय,असक्त र वृद्धवृद्धाहरुको निजी आवास निर्माणको कामलाई छिटो सम्पन्न गर्न पनि प्राधिकरणलाई सचेत गराएका थिए ।
प्राधिकरणको संगठनात्मक संरचना पनि पुनरावलोकन गर्ने निर्णय गरिएको छ । स्थानीय सरकार संचालन ऐन अनुसार आगामी चैत्र २८ गतेबाट जिल्ला तहमा रहेका सबै संरचना खारेज हुने भएपछि प्राधिकरणको संगठनात्मक संरचना पनि पुनरावलोकन गर्ने निर्णय गरिएको प्राधिकरणका प्रमुख कार्यकारी अधिकृत भुसालले स्पष्ट पारे । संरचना अनुसार जिल्ला तहमा प्राधिकरणको अनुदान व्यवस्था र स्थानीय पूर्वाधार, भवन ईकाई र शिक्षा गरेर ३ वटा ईकाई रहने व्यवस्था गरिएको छ । हाल विभिन्न मन्त्रालयबाट हुँदै आएको कामलाई प्राधिकरणको मातहत ल्याउने निर्णय पनि समितिको बैठकले गरेको छ ।
प्राधिकरणले हालसम्म १ लाख १४ हजार निजी आवास निर्माणको काम सम्पन्न भएको जनाएको छ । प्राधिकरणका प्रमुख कार्यकारी अधिकृत भुसालका अनुसार ३ लाख ९० हजार निजी आवास निर्माणाधिन अवस्थामा रहेका छन । असार मसान्तसम्म ४ लाख ५० हजार निजी आवास निर्माणको काम सम्पन्न गर्ने गरी काम भईरहेको प्राधिकरणको दावी छ ।
प्रकाशित मिति: २० चैत्र २०७४, मंगलवार १३:१९
