रत्ननगर (चितवन), ६ साउन । संरक्षित वन्यजन्तुको आवतजावत हुने क्षेत्र चितवनको टिकौलीस्थित जैविकमार्गको सुरक्षा प्रभावकारी हुँदै गएको छ ।
‘अस्थायी सुरक्षा चौकी’ स्थापना गरेर यस क्षेत्रमा लापरबाही गरी रोक्ने सवारी साधनलाई कारबाही गर्न थालेपछि जैविकमार्गको सुरक्षा प्रभावकारी हुँदै गएको हो ।
अहिले सो क्षेत्रमा सवारी रोक्ने क्रम पूर्णरुपमा नियन्त्रणमा आएको चितवन राष्ट्रिय निकुञ्जका प्रमुख संरक्षण अधिकृत रामचन्द्र कँडेलले जानकारी दिए । उनले सो संवेदनशील क्षेत्रको सुरक्षामा कडाइ गर्न निर्देशन दिएकोसमेत बताए ।
सवारी साधन जथाभावी रोक्ने र तीव्रगतिका कारण वन्यजन्तुको ज्यान समेत जोखिममा परेपछि यहाँ यस्तो अभियान थालिएको हो । साउन १ गतेबाट अस्थायी सुरक्षा चौकी स्थापना गरी गाडीलाई कारबाही गरेर नेपाली सेना, जिल्ला वन कार्यालय र सशस्त्र वन रक्षकले निगरानी गर्ने गरेको छ ।
चितवन राष्ट्रिय निकुञ्ज, जिल्ला वन कार्यालयको सहकार्यमा शुरु गरिएको यो अभियानअन्तर्गत जथाभावी फोहर फाल्ने विरुद्धसमेत कारबाही गरिन्छ ।
चितवन निकुञ्जका सहायक संरक्षण अधिकृत अभिनय पाठकले यस क्षेत्रमा मोटरसाइकल रोक्नेलाई रु १००, साना सवारीलाई ५०० र ठूला गाडीलाई एक हजार जरिवाना लिने गरिएको जानकारी दिए ।
साउन १ देखि ५ गतेसम्म पाँच दिनको अवधिमा एकसय बढी सवारी कारबाहीबाट झण्डै रु एक लाख राजस्व संकलन भएको निकुञ्जले जनाएको छ । अझै गाडीको गतिनियन्त्रण भने हुनेसकेको छैन । यसतर्फ ध्यान दिन संरक्षणकर्मीले अनुरोध गरेका छन् ।
चितवन निकुञ्ज र महाभारत पर्वत जोडेन् मुख्ग जैविक मार्ग(कोरिडोर) चितवनको टिकौली जंगल हो । पूर्व–पश्चिम राजमार्गमापर्ने यो करिब पाँच किलोमिटर क्षेत्र अति संवेदनशील छ । दिउँसै पनि यहाँ वन्यजन्तु आवतजावत गरिरहेका देखिन्छन् । रासस
प्रकाशित मिति: ६ श्रावण २०७४, शुक्रबार १३:०७
