काठमाडौं, १ साउन । प्रधानन्यायाधीशका लागि प्रस्तावित गोपाल प्रसाद पराजुलीले मुस्कान सहितको न्यायिक सेवा सुरु गर्ने बताएका छन् ।
व्यवस्थापिका संसद अन्र्तगतको संसदीय सुनुवाई विशेष समितिको बैठकमा सांसंदहरुको प्रश्नको जवाफ दिदै पराजुलीले न्याय स्वच्छ, निश्पक्ष, छिटो, छरितो र प्रभावकारी हुनुपर्छ भन्ने समग्र चाहाना सम्बोधन गर्न आफुले मुस्कान सहितको न्यायिक सेवा सुरु गर्ने बताएका हुन । झन्झटीलो, ढिला सुस्ती, विकृत अनि विसंगतिपूर्ण न्यायपालिकालाई कसरी सुधार गर्नुहुन्छ भन्ने समिति सदस्यहरुको प्रश्नमा उनले आदिकवि भानुभक्तको रचना उदृत गर्दे प्रभावकारी न्याय सेवाकालाई प्रद्धति र प्रणालीको विकास गर्ने बताए ।
विधिको शासन, प्रभावकारी न्याय, सक्षम सुलभ र पहुँचयोग्य बनाउदै जनआस्थामा आधारित न्यायको कल्पना आफुले गरेको भन्दै पराजुलीले आफु सधै न्यायलय सुधारको पक्षमा अघि बढ्ने बताए । बैठकमा पराजुलीले सांसदहरुले राखेको जिज्ञासामा उत्तर दिदै ३९ बुँदे कार्ययोजना पेश गर्दै मुस्कान सहितको सेवा सुरु गर्ने बताए । न्यायलयभित्रको न्यायिक उत्तरदायित्व र शुसासनका लागि आफु सधै तत्पर रहेको पनि उहाले उल्लेख गरे ।
न्यायाधीश पराजुलीले स्थानीय तहको निर्वाचन र प्रहरी नायब महानिरीक्षक नवराज सिलवालको मुद्धाले धेरै नै प्राथमिकता पाएको भन्दै उनले छिट्टै नै फैसला आउने बताए । बन्दी प्रत्यक्षीकरणको मुद्धालाई पनि थाँती राखेर यी दुई मुद्धालाई प्राथमिकतामा राखेको भन्दै उहाले प्रदेश नम्बर २ को स्थानीय तहको निर्वाचन अगाडि नै भरतपुर महानगरपालिकाको सम्बन्धमा परेको मुद्धाको फैसला पनि आउने बताए । ।
संसदीय सुनुवाई पछि समितिले आइतबार प्रधानन्यायाधीशका लागि प्रस्तावित पराजुलीको नाम सर्वसम्मति अनुमोदन गरेको छ ।
प्रकाशित मिति: १ श्रावण २०७४, आईतवार १२:५१
