काठमाडौँ, २५ असार । नेकपा (एमाले) का वरिष्ठ नेता झलनाथ खनालले दक्षिण कोरिया र नेपालमा प्रजातान्त्रिक आन्दोलनमा सञ्चारमाध्यमले महत्वपूर्ण भूमिका खेलेको बताएका छन् ।
एसियाली राजनीतिक पार्टीको सम्मेलनको स्थायी कमिटीको २८ औँं बैठकको सिलसिलामा दक्षिण कोरियामा पुगेका खनालले ‘आइक्याप मिडिया फोरमको तेस्रो बैठक’ लाई आज सम्बोधन गर्दै सञ्चारमाध्यमले राजनीतिक र सामाजिक क्रान्तिमा महत्वपूर्ण भूमिका खेलेकाले सञ्चारमाध्यमलाई अझ सामाजिक उत्तरदायी रुपमा विकास गर्दै जानुपर्ने धारणा राखेको उनका स्वकीय सचिव कृष्ण भट्टराईले जानकारी गराए ।
खनालले प्रविधिका कारण अहिलेको सञ्चारमाध्यमलाई आतङ्कवादीले दुरुपयोग गर्न सक्ने बताउँदै सञ्चारमाध्यमले समाज र राजनीतिको समस्या मात्र उजागर नभई समाधानको उपाय पनि दिनुपर्ने बताए । ‘‘मिसन पत्रकारिताले केवल मिसन मात्र हेर्दछ, त्यसले समाचार तोडमोड गर्दछ’’, उनले भने, ‘‘तर साँचो अर्थमा मिसन पत्रकारिताले जनताको आवाज नबोल्न सक्दछ । त्यसैले मिसनभन्दा व्यावसायिक पत्रकारिता गर्नुपर्दछ ।’’
उनले सञ्चारमाध्यमले जनताका शिक्षा, रोजगार, पूर्वाधार विकास, असल शासन, मानव तथा सामाजिक विकासका विषयलाई उजागर गर्नुपर्ने आैँल्याए ।
उक्त सत्रमा आइक्याप स्ट्यान्डिङ कमिटी सदस्य तथा पाकिस्तान मुस्लिम लिग (क्यु)का महासचिव मुसाहिद हुसेन, भारतीय काँग्रेसका नेता अनिल शास्त्री, भारतीय जनता पार्टीका नेता विजय जोलीलगायतले आफ्ना धारणा राखेका थिए।
पूर्वप्रधानमन्त्री खनाल नेपाली समुदायले दक्षिण कोरियाको सोलमा आयोजना गरेका विभिन्न कार्यक्रममा पनि सहभागी भई आगामी बुधबार नेपाल फर्किने बताइएको छ । रासस
प्रकाशित मिति: २५ असार २०७४, आईतवार १५:१७
