गौशाला(महोत्तरी), २० चैत । गरिबी, बेरोजगारी र विभिन्न घरायसी समस्याका कारण शिक्षाबाट वञ्चित यहाँका दलित र मुस्लिम समुदायका किशोरी किशोरी शिक्षाप्रति आकर्षित भएका छन् ।
जिल्लाको विभिन्न गाविसमा विश्व शिक्षा कार्यक्रमको सहयोग एवम् सामुदायिक परिवार कल्याण सङ्घ जनकपुर शाखाको आयोजनामा सञ्चालित किशोरी शिक्षा कार्यक्रममा स्थानीय दलित तथा मुस्लिम किशोरीको आकर्षणको बढेको हो । शिक्षाबाट वर्षौंदेखि वञ्चित दलित तथा मुस्लिम किशोरी ढिलै भएपनि शिक्षा पाईदो रहेछ भन्दै सो कार्यक्रमप्रति आकर्षित भएका हुन् ।
सङ्घले जिल्लाको जलेश्वर नगरपालिका–१४ अनकारस्थित दलित टोलमा सञ्चालन गरेको किशोरी शिक्षा कार्यक्रममा सहभागी २६ दलित किशोरीले कार्यक्रमले आफूलाई सरसफाइ, महिला हिंसा, बालविवाह, स्वास्थ्य र नैतिक शिक्षा प्राप्त भएको बताएका छन् ।
त्यसैगरी जिल्लाको धमौरा–९ भगवतीपुरमा सङ्घद्वारा आयोजित किशोरी शिक्षा कार्यक्रममा स्थानीय २९ दलित किशोरी लाभान्वित भएका छन् । निःशुल्क रुपमा दैनिक दुई÷तीन घन्टाका दरले पढ्न पाएका स्थानीय मुसहर समुदायका ती किशोरी यस शिक्षाले आफ्नो दैनिकी फेरिएको बताउँछन् । केही दिनअघिसम्म पढ्न, लेख्न र बोल्नसमेत नजानेका किशोरी अहिले यस कार्यक्रमको प्रभावले गर्दा राम्ररी पढ्न, लेख्न र तर्कपूर्ण तरिकाले बोल्न जानेका छन् । घरेलु हिंसा, यौनहिंसा, ललाई फकाई ठगी गर्ने, शारीरिक स्वास्थ्य, बालविवाह, ढिलो विवाहजस्ता विषयमा जानकारी पाएका उनीहरुले आफ्ना कुरा घरपरिवारसहित समाजका अगुवासमक्ष राख्न सक्षम भएका छन् । । उनीहरुले आउँदो वैशाखमा स्थानीय विद्यालयमा भर्ना भएर थप्प शिक्षा लिन इच्छुक रहेको जनाएका छन् ।
त्यसैगरी सोही स्थानमा सङ्घले सञ्चालन गरेको आमा कक्षा कार्यक्रममा पनि स्थानीय १४ महिला निक्कै उत्साहका सहभागी भएका छन् । रासस
प्रकाशित मिति: २० चैत्र २०७३, आईतवार १२:५४