इनरुवा, ८ चैत । अगामी बैशाख ३१ गते हुने स्थानीय तहको निर्वाचनका लागि सुनसरीबाट ४ लाख २९ हजार मतदाता रहेका छन् । पन्छिलो तीन वर्षकै अवधिमा झण्डै ६० हजार मतदाता थपिएसगैँ स्थानीय तहको निर्वाचनमा ४ लाख २९ हजार मतदाताले मतदान गर्ने भएका हुन् ।
जिल्लामा हालसम्ममा चार लाख २९ हजार ८ सय २३ मतदाताको नामावली दर्ता भएको जिल्ला निर्वाचन अधिकारी जानकी कर्णले जानकारी दिए । दोस्रो संविधानसभाको निर्वाचनमा पुरुष मतदाता एक लाख ८४ हजार ५ सय १५ र महिला मतदाता १ लाख ८७ हजार ५ सय ६५ गरि कुल ३ लाख ७२ हजार ८० जना रहेकोमा सो संख्या बढेर अहिले ४ लाख २९ हजार पुगेको हो । बढेको मतदाता संख्या झण्डै ६० हजारले बढिरहेको अधिकारी कर्णले जानकारी दिए ।
जिल्लामा विवाह गरेर आउने महिला, विदेशबाट फर्किएका पुरुष र उमेर पुगेका व्यक्ति तथा पहाडी जिल्लाबाट बसाई सरेर आएकाहरु बढेकाले मतदाता संख्या ह्वातै बढेको प्रमुख कर्णको भनाइ छ ।
यस वर्ष मात्र ११ हजार नयाँ मतदाताहरु बढेको कार्यालयका नायव सुब्बा शान्तिबहादुर अधिकारीले जानकारी दिए ।
इनरुवामा गाभिएका मधेसा, चाँदवेला, डुम्राहाका २, ७ र ९ वडा, बबिया र जल्पापुर क्रमश ६,७,८,९ र १० नम्बर वडा कायम भएका छन् । नाम परिवर्तन गर्ने देखि तहगत संरचना कार्यान्वयनमा आएनआए बारे जिल्ला समन्वय समिति सुनसरीले अनुगमन समेत अघि बढाएको छ । सुनसरीमा २ उपमहानगर, ४ वटा नगरपाालिका र ६ गाउँपालिका सहित १२ वटा स्थानीय तह कायम भएका छन् ।
प्रकाशित मिति: ८ चैत्र २०७३, मंगलवार ०८:३०
