काठमाडौँ, २८ फागुन । स्वास्थ्यमन्त्री गगनकुमार थापाले सम्मान र आदार कसैको दान विषय नभई अधिकार भएको बताए ।
‘१९ आैँ अन्तर्राष्ट्रिय आत्म सम्मान तथा आदार दिवस’ का अवसरमा एसोसियसन फर आइडिया नेपाल र द लेप्रोसि मिसन नेपालले आयोजना गरेको कार्यक्रममा उनले जुनसुकै अवस्थाका व्यक्तिलाई अपमान गर्न नपाइने कुरा सविधानले नै सम्बोधन गरेको बताए ।
उनले भने, “शारीरिक रुपमा फरक क्षमता भएका व्यक्तिप्रतिको धारण ऐन, नियम बनाएर हुदैँन, समस्या हाम्रो हुर्काई, बढाई र सोचमा भएकाले त्यसलाई परिवर्तन गर्नु आवश्यक छ ।”
विश्वभरि अङ्ग्रेजी महिनाको मार्च ११ तारिखलाई कुष्ठरोगले प्रभावित व्यक्तिको जीवनमा नयाँ उर्जा र आत्मविश्वास साथ पुनरागमन गरी आफ्नो हक, हित, अधिकार, सम्मान र सहअस्तित्वका लागि ‘अन्तर्राष्ट्रिय आत्म सम्मान तथा आदार दिवस’ मनाउने गरिन्छ ।
द लेप्रोसि मिसन नेपालका अध्यक्ष शोभाखर कडेलले कुष्ठरोेगीबारे समाजमा नकारात्मक र भ्रमात्मक सोच तथा दृष्टिकोणलाई परिवर्तन गर्न जनचेतनामूलक कार्यक्रम विस्तार गर्नुपर्ने आवश्यकता औल्याए ।
उक्त दिवसको अवसरमा आयोजक तथा विभिन्न क्षेत्रका व्यक्ति र कुष्ठ प्रभावितले वसन्तपुरमा र्यालीको आयोजना गरेका थिए । रासस
प्रकाशित मिति: २८ फाल्गुन २०७३, शनिबार १७:००
