काठमाडौँ, २६ फागुन । सरकारले देशका सम्पूर्ण आयात निर्यातकर्तालाई एग्ज्मि कोण अनिवार्य रुपमा लिन आग्रह गरेको छ ।
नेपाल समुद्रपार निकासी पैठारी सङ्घको आज यहाँ आयोजित ३८ औँ साधारण सभामा अर्थ मन्त्रालयका (राजस्व) सचिव राजन खनालले त्यस्तो आग्रह गर्नुभएको हो ।
उद्यमी व्यवसायीका साथै आयात–निर्यातकर्ताको अभिलेख अद्यावधिक गर्न सरकारले आगामी साउन १ गतेदेखि एग्ज्मिकोण प्रणाली लागू गर्ने उहाँले बताउनुभयो ।
राजस्वका दायरालाई सुदृढ तुल्याउन तथा कर छल्न खोज्नेलाई निरुत्साहित गर्ने उद्देश्यले सरकारले एग्जिम कोण प्रणालीलाई अनिवार्य गर्न लागेको हो ।
नेपाल उद्योग वाणिज्य महासङ्घका अध्यक्ष पशुपति मुरारकाले एग्ज्मि कोण लिन सबै आयात निर्यात कर्ता तत्पर रहेका तर बैंक ग्यारान्टीस्वरुप रु १० लाख राख्न उनीहरु असमर्थ रहेका भन्दै त्यसलाई घटाउन माग गरे ।
राष्ट्रिय पुनःनिर्माण प्राधिकरणका प्रमुख कार्यकारी अधिकृत डा गोविन्दप्रसाद पोखरेलले भूकम्पपछिको पुनःनिर्माणमा सघाउनु उद्योगपति व्यापारीको पनि कतव्र्य भएको उल्लेख गर्दै सामाजिक उत्तरदायित्व निर्वाहमा पछि नपर्न सबैलाई आग्रह गरे ।
सङ्घका अध्यक्ष रमेश गुप्ताको सभापतित्वमा भएको उक्त कार्यक्रममा नेपाल उद्योग परिसङ्घका अध्यक्ष हरिभक्त शर्मालगायतले देशको आर्थिक विकासमा निजी क्षेत्रको भूमिकाबारे मन्तव्य व्यक्त गरेका थिए ।
साधारणसभाले हिमबहादुर रावलको अध्यक्षतामा २० सदस्यीय कार्यसमिति निर्विरोध निर्वाचित गरेको छ ।
रासस
प्रकाशित मिति: २६ फाल्गुन २०७३, बिहीबार ०७:३७
