काँकडभिट्टा २१ फागुन । सुखानी सहिद स्मृति दिवसको अवसर पारेर नेकपा एमालेले राष्ट्रिय एकताको सन्देशसहित शनिबारदेखि ‘मेची–महाकाली राष्ट्रिय अभियान’ सुरु गर्दैछ ।
मुलुकको पूर्वीद्धार काँकडभिट्टावाट विहान ११ वजे अभियान सुरु हुने छ । अभियानमा सहभागी वन्न एमाले अध्यक्ष केपी शर्मा ओली, वरिष्ठ नेता झलनाथ खनाल, माधव नेपाल, महासचिव ईश्वर पोखरले, पूर्व सभामुख सुवास नेम्वाङ, पूर्व गृहमन्त्री वामदेव गौतम, भीम रावल, योगेश भट्टराईलगायतका नेता शुक्रवार झापा आएका छन् ।
अभियानको पूर्व सन्ध्यामा आयोजित पत्रकार सम्मेलनमा एमाले अध्यक्ष तथा पूर्व प्रधानमन्त्री केपी शर्मा ओलीले नेपाली जनताका वीचमा जाति – जनजाति, मधेश –पहाड भन्दै अनेक प्रकारका भ्रम फिजाएर जनतामा घृणाभाव, वैरभाव फैलाउने दुस्प्रयत्न भएको भन्दै नेपालीवीच सद्भाव जगाउन अभियान थालीन गरिएको बताए । ‘राष्ट्रिका लागि सद्भाव र सहयोगी भावना हुनुपर्छ’, ओलीले भने,‘ सवै मिलेर देश वनाउनु पर्छ । सवैले हक अधिकार पाउनुपर्छ ।’
१५ दिने अभियानमा तराईका २२ जिल्लालाई समेट्ने गरी ३५ स्थानमा आमसभा आयोजना गरिने एमालेले जनाएको छ । ‘यसले पार्टीको मधेश दृष्टिकोण प्रष्ट हुने छ’, एमालेका वैकल्पिक केन्द्रिय सदस्य रविन कोइरालाले भने,‘नयाँ संविधान जारी पछि एमालेले मधेसप्रति नकारात्मक दृष्टिकोण राखेको आरोपलाई चिर्न अभियान सफल हुने छ ।’
काँकडभिट्टाबाट सुरु अभियान महाकालीको सुर्खेत पुगेर टुंगिने छ । अभियानभर एक हजार भन्दा वढी पार्टी नेता तथा कार्यकर्ता सहभागी हुने जनाइएको छ ।
यसैवीच एमालेका अध्यक्ष तथा पूर्व प्रधानमन्त्री ओलीले कुनै शक्तिले पनि निर्वाचन रोक्न नसक्ने दावी गरे । उनले १९ वर्षपछि हुन लागेको चुनाव नरोकिने ठोकुवा गरे । संविधान कार्यान्वयनका लागि तीनै तहको चुनाव अनिवार्य भएको बताए ।
सुखानी हत्या काण्डका सहिद वीरेन राजवंशीको ज्यामिगढीमा निर्मित प्रतिष्ठानको शुक्रवार उदघाटन गर्दै ओलीले स्थानीय निकायको चुनावको मिति घोषणा भइसकेको बताउदै केन्द्र र प्रदेशको चुनाव पनि लगत्तै हुने दावी गरे ।
२०२९ सालमा जेल सार्ने वहानामा मारिएका पाँच मध्येका सहिद वीरेन राजवंशीको स्मृतिमा ज्यामिरगढी–३ मा प्रतिष्ठान भवनसहित अर्धकदको सालिक समेत निर्माण गरिएको छ ।
प्रकाशित मिति: २१ फाल्गुन २०७३, शनिबार ०६:५०
