काठमाडौ ८ फागुन । नेपालको पूर्वाधार विकासका लागि सिर्जनात्मक सोच, प्रविधि र विधि पहिचान गर्ने उद्देश्यले आइतबारदेखि काठमाडौँमा दोस्रो नेपाल पूर्वाधार सम्मेलन– २०१७ आयोजना हुँदैछ ।
भौतिक पूर्वाधार तथा यातयात मन्त्रालय, नेपाल उद्योग परिसङ्घ (सीएनआई) र युवा निर्माण व्यवसायी सङ्घ नेपाल (वाईसीएनसी)ले आयोजना गरेको सम्मेलन दुई दिनसम्म चल्नेछ ।
विभिन्न सरकारी तथा गैरसरकारी निकाय, द्विपक्षीय एवं बहुपक्षीय विकास साझेदारहरूको सहभागिता रहने सम्मेलनमा पूर्वाधार विकासमा निजी क्षेत्रको अपरिहार्यतामाथि छलफल गरिनेछ ।
त्यसैगरी, देश विकासमा निजी क्षेत्रको लगानी आकर्षित गर्नु, दिगो र दरिलो पूर्वाधार सञ्जालको विकासका लागि लगानी बढाउन दबाब सिर्जना गर्नु पनि सम्मेलनको उद्देश्य रहेको छ ।
शिखर सम्मेलनमा नेपाल लगानी बोर्डले सुरु गरेका करिब ५० वटा सम्भाव्य पूर्वाधार परियोजनाको प्रदर्शनीसमेत हुने आयोजक सीएनआईले जनाएको छ ।
सम्मेलनमा आइडिया स्टुडियोको सहकार्यमा परिसङ्घले विभिन्न व्यक्ति तथा संस्थाबाट सङ्कलन गरेका पूर्वाधार विकाससम्बन्धी उत्कृष्ट विचार (आइडिया) पनि प्रस्तुत हुनेछन् ।
छानिएका १० आइडियामध्ये पनि सबैभन्दा उत्कृष्ट मानिएको आइडिया र लगानीकर्ताबीच समझारीसमेत गरिने योजना रहेको छ ।
आइडिया स्टुडियोले ४५ भन्दा बढी व्यक्ति तथा संस्थाबाट यातायात, सिञ्चाइ, ऊर्जा, हाउजिङ, डिजिटल र पर्यटन क्षेत्रमा लागू गर्न सकिने नव–प्रवर्तक आइडिया सङ्कलन गरेको छ ।
तीमध्ये उत्कृष्ट ठहरिएका १० वटा पूर्वाधार विकासका आइडिया व्यवस्थापिका संसद्को विकास समितिमा प्रस्तुतसमेत भइसकेका छन् ।
सम्मेलनमा नेपालका नीति निर्माण तहमा रहेका व्यक्तित्व, भारतका रेलमन्त्री सुरेश प्रभाकर प्रभुलगायतका व्यक्ति प्रमुख वक्ता हुनेछन् ।
साथै, विभिन्न क्षेत्रका विशिष्ट र बौद्धिक व्यक्तित्वबाट फरक फरक विषयमा प्रस्तुतीकरण रहने कार्यक्रम रहेको छ ।
यसअघि २०७१ सालमा यस्तै सम्मेलन आयोजना गरिएको थियो ।
यस वर्ष सम्मेलनमा विशेषगरी पूर्वाधारसम्बन्धी बृहत् परिदृश्य, निजी तथा सार्वजनिक लगानी आकर्षण गर्नमा देखिएका अवरोध तथा बाधा, निजी साझेदारी सहकार्यलाई बढाउने, पूर्वाधार विकासमा वित्तीय लचकता, विश्व वा क्षेत्रीय रूपमा सफल निजी–साझेदारी मोडलका नमुनाहरूमा छलफल केन्द्रित रहनेछ ।
प्रकाशित मिति: ८ फाल्गुन २०७३, आईतवार ०६:५०
