त्रिशूली (नुवाकोट), ३ फागुन । भूकम्पले भत्केका निजी आवास निर्माणका लागि पहिलो किस्ताको रकम ९० प्रतिशतभन्दा बढी वितरण भइसके पनि पुनःनिर्माणले गति लिन नसकेको सरोकारवालाले बताएका छन् ।
आज यहाँ आयोजित ‘भूकम्प पछिको पुनःनिर्माण, जीविकोपार्जन, अभिमुखीकरण र गुनासो व्यवस्थापन बिषयक’ अन्तक्र्रिया कार्यक्रममा उनीहरुले सो कुरा बताएका छन् ।
नुवाकोटका स्थानीय विकास अधिकारी एवम् जिल्ला आयोजना कार्यान्वयन इकाइका प्रमुख केशरबहादुर पण्डितले प्राविधिक मात्र खटाएर पुनःनिर्माण नहुने बताउँदै पुनःनिर्माणका लागि आवश्यक वातावरण सिर्जना गर्नुपर्दछ भने ।
जिल्लाकै भाल्चे र फिकुरी गाविसको उदाहरण दिँदै उनले भने, “सरकारी र गैरसरकारी सबै गरेर १२ जना प्राविधिक त्यहाँ खटिएका छन्, तर पनि काम हुन सकेको छैन, त्यसैले प्राविधिक खटाएर मात्र काम नहुँदो रहेछ, यसका लागि आवश्यक वातावरण निर्माण गर्नुपर्ने देखिएको छ ।”
स्थानीय विकास अधिकारी पण्डितले पुनःनिर्माणका लागि पहुँचको अवस्था र निर्माण सामग्रीको सहज उपलब्धताको खाँचो रहेको बताउँदै पुननिर्माणका लागि चार लाख क्युफिट बालुवा आवश्यक भएकोमा अहिले जिल्लामा ५० हजार क्युफिट बालुवा मात्र उत्पादन भइरहेकाले यसलाई बढाउनुपर्नेमा जोड दिए ।
“काठको २० प्रतिशत मात्र उपलब्ध गराउन सकिने अवस्था रहेकाले ८० प्रतिशत कसरी उपलब्ध गराउने यसबारे प्राधिकरणले बाटो देखाइ दिनुपर्छ उहाँले भन्नुभयो ।”
प्रमुख जिल्ला अधिकारी विष्णुप्रसाद पोखरेलले गाउँगाउँमा सहजीकरण कमिटी बनाए मात्र पुनःनिर्माणले गति लिने बताए ।
सहरी विकास मन्त्रालयअन्तर्गतका जिल्ला आयोजना कार्यान्वयन इकाइका प्रमुख विदुर खड्काले पुनःनिर्माणको कामले गर्दा सहरी विकास तथा भवन निर्माण डिभिजन कार्यालयको नियमित काम गर्न नसकेकाले पुनःनिर्माण हेर्नका लागि छुट्टै इकाइको खाँचो रहेको छ भने ।
नेपाली काँग्रेसका जिल्ला सचिव सुरेन्द्रराज अधिकारीले निर्माण सामग्रीको सहज उपलब्धता हुनुपर्नेमा जोड दिदैं जिल्लामा जोखिमयुक्त भनेर तोकिएको ठाउँका बासिन्दालाई कहाँ लैजाने, त्यसको पनि चाँडो विकल्प खोज्न आग्रह गरे ।
सो अवसरमा राष्ट्रिय पुनःनिर्माण प्राधिकरणका कार्यकारी सदस्य धु्रवप्रसाद शर्माले प्राधिकरणले गुठी, सकुम्बासी र विर्ता लगायतका जग्गाको सम्बोधन गरिसकेको जानकारी दिदैं जग्गाका कारण रकम रोकिने अवस्था नरहेको बताए ।
सबै काम प्राधिकरणले मात्र गर्छ भनेर नसोच्न आग्रह गर्दै यसका लागि २१ वटा मन्त्रालय जिम्मेवार रहेकाले सबैले आ–आफ्नो दायित्व पुरा गर्नुपर्नेमा जोड दिए ।
नुवाकोटमा प्राधिकरणले ६५ हजार ७५९ जना लाभग्राहीको सूची प्रकाशित गरेकोमा अहिलेसम्म ६२ हजार ४६ जनाले पहिलो किस्ता रकम पाइसकेका छन् । जिल्लामा अहिले छ हजार घर मात्र पुनःनिर्माण भइरहेको जनाएको छ ।
रासस
प्रकाशित मिति: ३ फाल्गुन २०७३, मंगलवार ०६:४१
