सुर्खेत, १७ माघ । राष्ट्रियता एकता, समृद्धि, स्वाभिमान र संविधानको कार्यान्वयन एमालेको अभियान भन्ने मुल नारा सहित नेपाल उद्योग तथा व्यवसायी महासंघको आयोजनामा प्रदेश स्तरीय भेला सोमबार वीरेन्द्रनगरमा भएको छ ।
उक्त भेलालाई सम्बोधन गर्दै नेकपा एमालेका उपाध्यक्ष तथा प्रदेश नम्बर ६ का संयोजक युवराज ज्ञवालीले एमाले एकजुट भएर राष्ट्रलाई जोगाउनु पर्ने धारणा राखेका छन् । नेता ज्ञवालीले राष्ट्रबादको चर्को नारा लाउदैमा राष्ट्र जोगाउन मुश्कील रहेको बताए । उनले भारतले नेपाललाई गिद्धे नजर लगाएकाले भारतबाट नेपाललाई जोगाउनका निमित्त एमाले सबै एकजुट भएर अघि बढ्नु पर्ने बताए ।
नेपाललाई जति सक्यो उत्पादन बढाउन सक्यो भने मात्रै परिवार, जनता र देशलाई जोगाउन सकिने नेता ज्ञवालीले बताए । उनले देशलाई उत्पादनमुखी बनाएर भारतबाट आयात कम निर्यात धेरै गर्नु पर्ने धाराणा राखे । साथै उनले प्रदेश नम्बर ६ मा जल, जडिबुटी, जैविक, पर्यटनको अथाह सम्भावना रहेको भन्दै यसलाई सुन्दर र समृद्धिमय बनाउनु पर्नेमा जोड दिए ।
कार्यक्रममा पोलिट व्युरो सदस्य प्रकाश ज्वालाले संविधान संशोधनको अहिलेको प्रक्रिया गलत रहेको बताए । साथै उनले अहिले अङगीकृत नागरिकता सहज दिएको एमालेलाई स्वीकार्य नभएको बताए । पोलिट व्युरो सदस्य ज्वालाले एमालेमा रहेका हरेक व्यक्ति उत्पादनमा लाग्नुपर्नेमा जोड दिए ।
नेपाललाई उत्पादनमुखी देश बनाएर युवाहरुलाई रोजगारी दिलाउने सकिने संभावना रहेको पोलिट व्युरो सदस्य ज्वालाले बताए । उनले पार्टी भित्र गुट उपगुट नगरेर मुलुकलाई आर्थिक समृद्धिको बाटोमा लैजान जोड दिनु पर्ने बताए ।
प्रदेश नम्बर ६ का सहसंयोजक यमलाल कंडेलले उद्योग व्यवसाय र आर्थिक समृद्धिका लागि कसरी अगाडि बढ्न सकिन्छ भन्ने तरीकाले सबैलाई अघि बढ्नु पर्ने बताए । उनले एमाले एउटै संगठनमा रहेर गुट उपगुट नगरेर अघि बढ्न आग्रह गरे ।
कार्यक्रममा नेकपा एमाले सुर्खेतका अध्यक्ष धु्रुव शाही, नेपाल उद्योग तथा व्यवसायी महासंघका उपाध्यक्ष डेकनाथ गौतम, नेपाल उद्योग तथा व्यवसायी महासंघका वरिष्ठ उपाध्यक्ष भरत श्रेष्ठ, उद्योग तथा वाणिज्य विभागका सदस्य बल बहादुर तामाङ, नेपाल राष्ट्रिय वाणिज्य संघका केन्द्रिय अध्यक्ष धनराज आचार्य लगाएतले आ–आफ्नो भनाई राखेका थिए ।
प्रकाशित मिति: १७ माघ २०७३, सोमबार १८:०६
