बर्दिबास । दाउरा बेचेर जिउने बर्दिबास मुसहर बस्तीका वासिन्दाको दैनिकी फेरिन थालेको छ । दाउरा काट्ने र ज्यालादारी काम गरेर दिन विताउने उनीहरु आजभोली आफ्नो घर आफै बनाउने काममा व्यस्त छन् ।
जाडो महिना, तराईको बस्ती, अनि विहान पौन सात बजे काम गर्न आउने तालिका साँझ ७ बजेसम्म काममै व्यस्त । करिब १४ घण्टाको यो समयमा खाना र खाजाको समय करिब २ घण्टा । यो हो, मुसहर बस्तीको अहिलेको दैनिकी ।
कमजोर आर्थिक अवस्थाका कारणले जमिन भएर पनि घरवास बनाउन नसकेका ५० घर परिवार रहेको यो मुसहर समुदाय अहिले हरेक घरबाट एक जना आफ्नो घर निर्माण अभियानमा सरिक भएका छन् ।
यो काम गरे वापत एक जनाले ३ सय रुपैयाँ ज्याला पाउने छन् । ज्याला पनि पाउने आफ्नो घर निर्माणमा सहभागि हुने मौका पाएका मुसहर समुदाय काममा निकै खटेका पनि छन् । घरको एक जना बाहेक थप काम गर्न ठेकेदारको सम्पर्कमा उनीहरुले काम गरिरहेका छन् ।
अभाव र गरिबीमा रुमलिएको मुसहर वस्तीमा गत पुस २५ गते देखि धुर्मुस–सुन्तली फाउन्डेसनले निर्माण थालेको बर्दिबासस्थित एकीकृत नमुना मुसहर बस्ती अहिले साँच्चिकै तंग्रिन थालेको छ ।
एक सय दिनमा ५० घर निर्माण गरि समुदायलाई हस्तान्तरण गर्ने अभियानकासाथ निर्माण थालिएको नमूना मुसहर वस्तीमा अहिलेसम्म ५० वटै घरका जग तयार भइसकेका छन् । घरको जग खनेर १० वटा घरको त पिलरै हालने क्रम जारी छ ।
वर्षौंदेखि रोग, भोक र अशिक्षाले पछाडि परेका महोत्तरीको बर्दिबास २ स्थित मुसहर बस्तीको मुहार फेर्न एकीकृत नमुना मुसहर बस्ती नाम परियोजना अघि बढाएर धुर्मुस–सुन्तली फाउन्डेसनले काम थालेको हो ।
बस्ती बनाउन ४ करोड ७८ लाख लाग्ने भएको छ ।
प्रकाशित मिति: ६ माघ २०७३, बिहीबार १८:४८
