सुर्खेत, ५ माघ ।
नेकपा एमाले निकट प्रेस चौतारी नेपाल सुर्खेतमा आवद्ध पत्रकार नवराज शर्मा सो संगठन परित्याग गरी कांग्रेस निकट नेपाल प्रेस युनियनमा आवद्ध भएका छन् । मंगलवार विज्ञप्तिसहित एक कार्यक्रमका वीच शर्माले माघ ४ गतेदेखि नै आफू युनियनमा आवद्ध भएको घोषणा गरेका हुन् । विगतमा आफू प्रजातान्त्रिक विचारधारा बोक्ने पत्रकार भएको र केही समय चौतारीमा भएपनि अहिले मूलघरमै फर्किएको उनले बताएका छन् ।
पत्रकारिता र व्यवसायलाई सँगसँगै लिएको जानकारी दिदैं उनले चौतारीमा बस्दा आफू मनैदेखि सन्तुष्ट हुन नसकेकोले अहिले युनियनमा आवद्ध भएको विज्ञप्तीमा जनाइएको छ । आफूलाई कुनै पद र अवसरको लोभ नभएको प्रष्ट्याउँदै शर्माले अव युनियनमा आवद्ध रही निरन्तर पत्रकारिता पेशामा क्रियाशील रहने प्रतिवद्धता जनाएका छन् । कार्यक्रममा नेपाली कांग्रेस सुर्खेतका सभापति कमलराज रेग्मीले शर्मालाई कांग्रेस तथा युनियनमा स्वागत गर्न पाउँदा खुशी लागेको बताउँदै क्रियाशील रहन पनि सुझाव दिएका छन् ।
शर्माको आगमनले युनियन थप बलियो हुने उनले जनाए । नेपाल उद्योग वाणिज्य महासंघका केन्द्रीय सदस्य टेकबहादुर भण्डारीले ढिलै भए पनि मूलघरमा फर्किएकोमा स्वागत गरेका छन् । प्रेस युनियन सुर्खेतका सचिव गणेशकुमार कार्कीले बहुमुखी प्रतिभाका धनी एवम् सशक्त पत्रकार शर्माको आगमनले युनियन थप मजबुत हुने जनाए । कार्यक्रममा कांंग्रेस क्षेत्रीय सभापति नारायण कोइराला, नगर सभापति देवकुमार सुवेदी, मप क्षेत्रीय उद्योग बाणिज्य संघका अध्यक्ष पदमबहादुर शाही, कांग्रेस नेता भूपेन्द्र विसी, प्रेस युनियनका सहसचिव अशोक राजीलगायतको उपस्थिति थियो ।
प्रकाशित मिति: ५ माघ २०७३, बुधबार १०:५०
