बर्दिबास । महजोडीले धुर्मुस–सुन्तलीले हास्यकलाकारिता क्षेत्रलाई उज्यालो बनाएको बताएका छन् । धुर्मस–सुन्तलीको अभियानमा सबैले सहयोग गर्न पनि महजोडीले अपिल गरेका छन् । धुर्मुस–सुन्तली फाउन्डेसनले निर्माण थालेको बर्दिबासस्थित एकीकृत नमुना मुसहर बस्तीस्थल पुगेका महजोडीले स्थानीय सञ्चारकर्मीसँग कुराकानी गर्दै देश निर्माणको यो अभियान सिँगो कलाकारिताले गवै गर्न लायकको रहेको बताए । यस्तै महजोडीले देश बनाउन हिँडेका धुर्मुस र सुन्तलीलाई देश विदेशमा रहेका सबै नेपालीले खुलेर सहयोग गरिदिन महजोडीले सबैमा अपिल गरेका हुन् ।
रकेटको गतिमा काम भइरेको भन्दै मदनकृष्ण श्रेष्ठले भने, ‘पुस २५ गते शिलान्यास गरेको नमुना बस्तीको निर्माण काम निकै अघि बढेछ । काम कसरी अघि बढ्छ भन्ने दृष्टान्त बनेको छ ।’ धुर्मुस–सुन्तलीले दर्शक मात्र नहसाएर अहिले विकासको कामबाट देशैलाई हसाइरहेको उनले बताए ।
‘ढिला सुस्तीले देश विकास हुन सकेको छैन,’ हरिवंश आचार्यले भने, ‘५ दिनमा २० वटा घरको जग खनेर १० वटा घरको त पिलरै हालने क्रम जारी छ ।’ दैनिक झन्डै २ सय कामदार खटेर जाडो मौसममा बस्ती निर्माणको काम भइरहेको छ । यो अभियानमा ६५ गाउँले श्रमदान गरिरहेका छन् । हरिवंशले भने, ‘मन सोझिएको छ, काम सोझिएको छ । आउने वैशाख १ गते यहाँहरू (मुसहरहरू) नयाँ घरमा सर्छन् ।’
कलाकारिता क्षेत्रका हस्तीहरू विकास निर्माण र समाजसेवाका क्षेत्रमा पसेर देश निर्माणको काममा जुटेका छन् । अब देश निर्माण गर्छौं भन्नेले के गर्लान्..? भन्ने प्रश्न चौतर्फी उठिरहेको छ । यस प्रश्नको उत्तरमा मदनकृष्णले भने, ‘चिन्ता गर्नु पर्दैन देश निर्माण गर्छौं भन्नेहरूले..। धुर्मुस–सुन्तली काभ्रेको पहरी बस्ती, सिन्धुपाल्चोकको गिरानचोर सकेर बर्दिबास मुसहर बस्ती आएका छन्् । यो सकेर कहीं जालान् । बाँकी सिँगै नेपाल देश बनाउँछौं भन्नेका लागि खुला छ । बनाउँछौ भन्नु..अनि बनाउन लाग्नु । भई हाल्यो नि ।’ नेपाली जनताले देश विकास, समृद्धि र शान्ति खोजिरहेका छन् । देशलाई सुन्दर बनाउन धेरै काम गर्न बाँकी छ । मदनको कुुरामा हरिवंशले थपे, ‘देशमा काम गर्नुपर्ने क्षेत्र विशाल छ । बनाउँछौँ भन्ने मित्रहरूले संकल्प गरी अघि बढे हुन्छ । सम्झिए हामी पनि सकेको सहयोग गर्न पुग्छौं ।’
वर्षौंदेखि रोग, भोक र अशिक्षाले पछाडि परेका महोत्तरीको बर्दिबास २ स्थित मुसहर बस्तीको मुहार फेर्न एकीकृत नमुना मुसहर बस्ती नाम परियोजना अघि बढाएर धुर्मुस–सुन्तली फाउन्डेसनले काम थालेको हो । बस्ती बनाउन ४ करोड ७८ लाख लाग्ने भएको छ । ‘यो मानवता र सद्भावको कार्य हो,’ धुर्मुसले आग्रह गर्दै भने, ‘बस्ती निर्माणका लागि सबैले हातेमालो गरौं ।’ सहयोगको लागि सबैमा उनीहरूले अपिल गरेका छन् ।
– आरके महतोको सहयोगमा
प्रकाशित मिति: १ माघ २०७३, शनिबार १२:३३
