काठमाडौ १ माघ । प्रधानमन्त्री पुष्पकमल दाहाल ‘प्रचण्ड’ वल्र्ड फ्युचर इनर्जी समिट, २०१७ को विशेष वक्ताका रूपमा सहभागी हुन १० सदस्यीय नेपाली प्रतिनिधिमण्डलको नेतृत्व गर्दै शनिबार संयुक्त अरब इमिरेट्स (यूएई)को राजधानी अबुधाबी प्रस्थान गर्ने भएका छन् ।
यूएईका उपराष्ट्रपति एवं प्रधानमन्त्री मोहम्मद विन रसिद मोक्तुमको विशेष निमन्त्रणामा प्रधानमन्त्री त्यसतर्फ जान लागेकाहुन् ।
प्रधानमन्त्रीको टोलीमा परराष्ट्र मन्त्रालयका सचिव शङ्करदास बैरागी, शिष्टाचार महापाल दीपक अधिकारी, उहाँको स्वकीय सचिवालयका सदस्य छन् । यस्तै ऊर्जामन्त्री जनार्दन शर्मा, ऊर्जा मन्त्रालयका सहसचिव लगायतको टोली पनि सोही प्रतिनिधिमण्डलको सदस्यका रूपमा समिटमा सहभागी हुने कार्यक्रम छ ।
प्रधानमन्त्रीले सोमबार समिटमा ऊर्जाका विभिन्न क्षेत्र, नेपालमा लगानीको अवसर, नेपालले अवलम्बन गरिरहेको नीति एवं भावी परिदृश्यबारे विशेष सम्बोधन गर्ने छन् ।
प्रधानमन्त्री दाहाल नेतृत्वको प्रतिनिधिमण्डलले यूएईका राष्ट्रप्रमुख, सरकारप्रमुख एवं उच्च अधिकारीसँग आपसी हित, द्विपक्षीय चासो, क्षेत्रीय एवं अन्तर्राष्ट्रिय चासोका विषयमा महत्वपूर्ण भेटवार्ता गर्ने कार्यक्रम रहेको परराष्ट्र मन्त्रालयका सहसचिव एवं शिष्टाचार महापाल अधिकारीले जानकारी दिए ।
भेटवार्ताका क्रममा प्रधानमन्त्रीले नेपाली कामदारको समस्या समाधान गर्न, सुरक्षित एवं भरपर्दो रोजगारीको वातावरण बनाइदिन र कामदारको सुरक्षाका विषयमा समेत समकक्षी एवं उच्च सरकारी अधिकारीसँग कुराकानी हुने कार्यक्रम छ । शिष्टाचार महापाल अधिकारीले कूटनीतिक सम्बन्ध स्थापना भएको लामो समय भए पनि यूएईमा यस स्तरको उच्चस्तरीय भ्रमण यसअघि नभएको बताए ।
प्रकाशित मिति: १ माघ २०७३, शनिबार ०८:२२
