काठमाडौँ, २९ पुस । निजी क्षेत्रको आधारबिना मुलुक अगाडि बढ्न नसक्ने व्यवसायीहरुले बताएका छन् ।
खिचापोखरी न्युरोड व्यापार सङ्घको ‘नवौँ वार्षिक साधारण सभा’का अवसरमा आज यहाँ आयोजित कार्यक्रममा नेपाल चेम्बर अफ कमर्शका अध्यक्ष डा राजेशकाजी श्रेष्ठले निजी क्षेत्रलाई अगाडि बढाउन नसके मुलुक अगाडि बढ्न नसक्ने बताए ।
उनले भने, “निजी क्षेत्रबाट तिरेको करले मुलुक चलेको छ त्यसैले मुलुकले निजी क्षेत्रलाई बेवास्ता गर्न मिल्दैन ।” अध्यक्ष श्रेष्ठले व्यापारीप्रति सरकारको विश्वास नहुँदा व्यापार क्षेत्रमा समस्या हुने गरेको गुनासो गरे ।
आन्तरिक राजस्व विभागका उपमहानिर्देशक धनिराम शर्माले कर नीतिको माध्यामबाट लगानी सुरक्षित गर्न व्यापारीलाई आग्रह गरे ।
महानगरीय ट्राफिक प्रहरी महाशाखाका प्रहरी वरिष्ठ उपरीक्षक मिलन बस्नेतले न्युरोड क्षेत्रको ट्राफिक व्यवस्थापनका लागि महाशाखा लागिरहेको स्पष्ट पारे । उनले भने, “सम्पूर्ण पक्ष एकजुट भए न्युरोड क्षेत्रको समस्याको समाधान हुन्छ ।” राष्ट्रिय अर्थतन्त्रमा टेवा पुर्याउन निजी क्षेत्रको महत्वपूर्ण भूमिका रहेको उनको भनाइ थियो ।
सङ्घका अध्यक्ष मनोजबाबु श्रेष्ठ, पूर्व अध्यक्ष राजेन्द्र शेरचन, करदाता सेवा कार्यालय न्युरोड शाखाका प्रमुख मुक्तिराम आचार्य, नेपाल चेम्बर अफ कमर्शका सचिव पर्शुराम दाहाललगायतले काठमाडौँको मुटुमा रहेको खिचापोखरी, न्युरोड क्षेत्रको समस्या समाधानका लागि सम्बन्धित पक्ष गम्भीर हुनुपर्नेमा जोड दिए । कार्यक्रममा व्यापारको क्षेत्रमा महत्वपूर्ण योगदान पुर्याएका व्यापारीलाई सम्मान गरिएको थियो । रासस
प्रकाशित मिति: २९ पुष २०७३, शुक्रबार १६:२८
