काठमाडौं । नेकपा एमालेले अब तराई मधेस अभियानमा केन्द्रित हुने घोषणा गरेको छ । राजधानीमा शुक्रबार गरिएको पार्टीको शक्ति प्रदर्शनलाई सम्बोधन गर्दै अध्यक्ष केपी ओलीले यस्तो घोषणा गरेका हुन् ।
‘केही व्यक्तिले एमालेलाई बाजा बजाएर मधेसबाट बिदा गर्ने भनेको सुनियो, म उनीहरूलाई हैसियत स्मरण गराउन चाहन्छु । सिंगो तराई मधेसमा उनीहरूले जितेको ११ सिट हो, एमाले एक्लैले ४० सिट जितेको छ । एमाले मधेसका जनताको बीचमा जागरण अभियान लिएर जाँदै छ,’ ओलीले भने । उनले फागुन दोस्रो सातापछि एमालेले मेची–महाकाली अभियान चलाउन लागेको र काठमाडौंको जागरणलगत्तै तराई मधेसमा सिंगो पार्टी केन्द्रित हुने उदघोष गरे ।
‘हामी मधेस अभियान चलाउँदै छौं । तराई जाँदै छौं । तराईका जनतामा रहेको देशभक्तिलाई कमजोरी नठाने हुन्छ । तराईका जनतालाई अल्मल्याउन सकिन्छ भन्ने नठाने हुन्छ । यस अभियानको अगाडि, यस देशभक्तिपूर्ण आन्दोलनको अगाडि एमाले छ,’ ओलीले भने ।
उनले संविधान संशोधन प्रस्ताव कुनै हालतमा पारित हुन नदिनेसमेत बताएका छन् । ‘काठमाडौं उपत्यका र राजधानीमा जागेको यो जागरणलाई देशव्यापी रूपमा फैलाउँछौं । राष्ट्रहितलाई तलमाथि हुन दिँदेनौं । संसदमा यो हैसियतसहित एमाले छ,’ उनले भने, ‘हामी राष्ट्रियहितविपरीतको संशोधन प्रस्ताव पारित हुन दिँदैनौं ।’
उनले हिजो संविधान जारी गर्न नदिने र संविधान च्यात्नेहरू अहिले संशोधनको कुरा गरिरहेको टिप्पणी गरे । ‘नेपाल हिजो पनि जिउँदो र स्वतन्त्र राष्ट्र थियो, आज पनि छ । भोलि पनि यसलाई यस्तै रहन्छ,’ अध्यक्ष ओलीले भने, ‘हाम्रा पूर्खाले लड्न सिकाएका छन् । लम्पसार पर्न कसैले सिकाएनन् । त्यसैले नेपाली जनताले अहिलेको ‘लम्पसारवाद’ लाई पनि मुर्दावाद भनिसकेका छन् ।’
अध्यक्ष ओलीले सरकार संविधान कार्यान्वयन, निर्वाचन गर्नभन्दा आयु लम्ब्याउन लागिपरहेको आरोप लगाए । उनले विभिन्न तहको निर्वाचन गर्न ११ महिनाभन्दा बढी समय नभएको भन्दै त्यसभित्र निर्वाचन गर्न नसकेमा संवैधानिक संकट निम्तिने बताए ।
प्रकाशित मिति: २२ पुष २०७३, शुक्रबार २१:३६
