सिन्धुपाल्चोक, १३ पुस । नेपाल–चीन सीमा बैठक सकिएको एक साता नबित्दै चिनियाँ उच्च अधिकारीहरूले नेपाली पक्षलाई बोलाएर तातोपानी नाका चाँडोभन्दा चाँडो सञ्चालन गर्न तयार रहेको बताएको छ ।
१२ वैशाख, २०७२ को विनाशकारी भूकम्प र बाढीपहिरोका कारण बन्द तातोपानी नाका खुलाउन भएका पटकपटकको प्रयासपछि चिनियाँ पक्षले औपचारिक रूपमै तत्काल नाका खोल्न चाहेका बताएका हुन् ।
मंगलबार सिन्धुपाल्चोकका प्रमुख जिल्ला अधिकारीसहितको टोलीलाई खासामा बोलाएर केही महिनाभित्रै तातोपानी नाका सञ्चालन गर्ने तयारीमा रहेको चिनियाँ अधिकारीले बताएका हुन् ।
भूकम्पले क्षतिग्रस्त सडक स्तरोन्नति गरिँदै बैठकमा चिनियाँ पक्षले नाका खोल्न तयार रहेको बताउँदै सीमाक्षेत्रमा हुने आपराधिक गतिविधि र चीनविरुद्ध हुने गतिविधि रोक्न नेपाललाई आग्रह गरेको थियो ।
‘चीनतर्फको मुख्य जोड सीमा सुरक्षा थियो, हाम्रो जोड नाका सञ्चालनमा थियो,’ बैठकबारे प्रमुख जिल्ला अधिकारी अन्तरबहादुर सिलवालले भने, ‘हामी सीमाक्षेत्रमा चीनविरोधी गतिविधि हुन नदिने र चिनियाँ पक्षले तत्काल नाका सञ्चालन गर्ने सहमति भयो ।’
गत ६ पुसमा सीमा जोडिएका जिल्लाका सुरक्षा अधिकारी र चीनको नेलामा स्थित सुरक्षा अधिकारीहरूबीच सीमा बैठक भएको थियो ।
दुई देशका अधिकारीहरूबीच मंगलबारको बैठकमा तिब्बतका उच्च अधिकारीहरूले भूकम्प र भोटेकोसीको बाढीका कारण भौतिक संरचनामा क्षति पुगेकाले मात्रै नाका सञ्चालन नभएको प्रस्ट पारेका थिए ।
बैठकबाट फर्किएलगतै प्रजिअ सिलवालले पत्रकार सम्मेलनमार्फत चिनियाँ पक्षको आश्वासनबाट उत्साही बनेको बताए । ‘आजको बैठकबाट हामी निकै उत्साही भएका छौं, ढुक्क हुनुहोस् अब तातोपानी नाका ९९ प्रतिशत खुल्छ,’ उनले भने ।
खासा बैठकमा तिब्बतका बोर्डर कन्ट्रोलका कमान्डर गाओ वानहासहितका उच्च अधिकारीहरू सहभागी थिए । ‘यसअघि हामी जिल्लाका अधिकारी मात्रै बैठकमा सहभागी थियौं, आज चिनियाँ केन्द्रीय टिम नै सहभागी भयो, त्यसैले पनि अब नाका खुल्छ,’ प्रजिअ सिलवालले भने ।
दुई देशबीचको बैठक सम्पन्न भएपछि निकै उत्साही देखिएका सिलवालले भने, ‘तातोपानी नाका मेरै कार्यकालमा खुल्छ । उनीहरूले पनि त्यही संकेत दिएका छन् ।’ नाका खुलाउने प्रयासस्वरूप नेपाल–चीन सीमा मितेरी पुलदेखि खासासम्म झन्डै १५ किलोमिटर सडक निर्माण तीव्रगतिमा निर्माण भइरहेको छ । सिलवालका अनुसार सो सडक निर्माण सम्पन्न भएलगतै नाका खुल्नेछ ।
भूकम्प र भोटेकोसी बाढी पहिरोपछि ध्वस्त भएको नेपालतर्फको सडक निर्माण कार्यको जिम्मा पनि चिनियाँ पक्षले नै पाएको थियो । सबैभन्दा समस्या देखिएको जुरेक्षेत्रको सडक निर्माण सम्पन्न भइसकेको छ भने लिपिङदेखि १० किलोसम्म पनि चिनियाँहरूले सडक निर्माण कार्यलाई तीव्रता दिइरहेका छन् ।
बाढीले क्षति पु¥याएको सडकको निर्माण कार्य सडक विभाग र चिनियाँ पक्षले संयुक्त रूपमा गरिरहेका छन् । निर्माणाधीन सुक्खा बन्दरगाहदेखि मितेरी पुलसम्म सडक निर्माणको जिम्मा चिनियाँ पक्षलाई दिएको डिभिजन सडक कार्यालय दोलखाले जानकारी दिएको छ । त्यस्तै, जुरे पहिरोपछि बिग्रिएको जुरे सडकखण्ड चिनियाँ पक्षले निर्माणको अन्तिम चरणमा पुर्याएको खबर राजधानी दैनिकमा दिनेश थापाले लेखेका छन् ।
प्रकाशित मिति: १३ पुष २०७३, बुधबार ०७:५२
