काठमाडौं । डिसेम्बर २५ अर्थात् क्रिसमस पर्व आइतबार नेपालमा पनि इसाई धर्मावलम्बीले हर्सोल्लासका साथ मनाइरहेका छन् ।
पर्वका अवसरमा राष्ट्रपति विद्यादेवी भण्डारीले नेपालीबीच बान्धुत्व, प्रेम र एकताको भावना बढाइ शान्त, समुन्नत नेपाल बनाउन सबैमा प्रेरणा प्राप्त होस् भन्ने कामना गरेकी छन् ।
भण्डारीको शुभकामना सन्देशमा स्वदेश तथा विदेशमा रहेका सम्पूर्ण इसाई धर्मावलम्बी नेपालीमा सुख, शान्ति, समृद्धि, सुस्वास्थ्य, आपसी सदभाव, एकता, भ्रातृत्व एवं उत्तरोत्तर प्रगतिका लागि शुभकामना व्यक्त गरिएको छ ।
फाइल तस्बिर : रासस
यस्तै प्रधानमन्त्री पुष्पकमल दाहालले पनि क्रिसमसको उपलक्ष्यमा स्वदेश तथा विदेशमा रहेका इसाई धर्मावलम्बी सबै नेपाली दिदीबहिनी तथा दाजुभाइप्रति सुस्वास्थ्य, दीर्घायु, सुख, शान्ति, समृद्धि र उत्तरोत्तर प्रगतिको शुभकामना व्यक्त गरेका छन् ।
दाहालले शुभकामना सन्देशमा सम्पूर्ण ख्रिस्टियन समुदायबाट संविधान कार्यान्वयन र समृद्धिको अभियानमा बलियो साथ र सहयोगको अपेक्षा गरेका छन् । आज (आइतबार) सरकारले मुलुकभर सार्वजनिक बिदासमेत दिएको छ ।
प्रकाशित मिति: १० पुष २०७३, आईतवार १४:३१
