सुर्खेत, ९ पुस । वीरेन्द्रनगरको महिला प्रशिक्षण केन्द्रमा रहेका वाढी पीडितहरुलाई न्यानो कपडा वितरण गरिएको छ । लामो समय देखि पालमा बस्दै अएका बाढी पीडितलार्इ जाडो बढेसँगै यूथ फर चेन्ज गुरुपले शनिबार न्यानो कपडा वितरण गरेको हो । शिविरमा रहेका २५ परिवारलाई प्रतिपरिवार एक–एक थान ब्लाङ्केटसहित जकेट, टिसर्ट वितरण गरिएको छ ।
उच्च शिक्षा अध्ययनरत विद्यार्थीहरुले फेसबुक गुरुप मार्फत सहयोग संकलन गरी न्यानो कपडा वितरण गरिएको गुरुपका सदस्य मनोज लम्सालले बताए । नेपाल र विदेशमा अध्ययनरत विद्यार्थीहरुले खाजा खर्च बचाएर सहयोग संकलन गरी शिविरमा रहेका वाढी पीडितलाई सहयोग गरिएको उनले बताए ।
फेसबुक गुरुपमार्फत कलेजमा पढ्ने विद्यार्थीहरुको छलफलबाट करिव ४४ हजार रुपैयाँ संकलन गरी चिसो मौसमलाई छल्न न्यानो कपडा वितरण गरिएको जानकारी दिइएको छ । कपडा वितरण कार्यक्रममा गुरुपका सदस्यहरु शिवानी ढकाल, भगवती शर्मा, समिर शर्मा, तुल्सी पुरी, सन्देश कडेल, नारायण शाहीलगायतको सहभागिता रहेको थियो ।
प्रकाशित मिति: ९ पुष २०७३, शनिबार १७:३५
