सुर्खेत, ८ पुस । सुर्खेत उद्योग वाणिज्य संघले कर्णाली एक्सपो अन्तर्राष्टिय व्यापार मेलाको उदघाटनका दिन झाँकी प्रदर्शनका क्रममा निधन भएकी बालिका समीक्षा आचार्यको स्मृतिमा शैक्षिक स्मृति पुरस्कार स्थापना गर्ने निर्णय गरेको छ ।
संघको आज (शुक्रबार) बसेको कार्य समितिको बैठकले बालिका आचार्यको निधनप्रति शोक प्रस्ताव पारित गर्दै समीक्षा आचार्य स्मृति शैक्षिक पुरस्कार स्थापना गर्ने निर्णय गरेको हो ।
संघको सदस्यका सन्ततिमध्ये एसएलसीमा सर्वाधिक अंकसहित उत्तीर्ण हुने छात्र र छात्रालाई वार्षिक साधारणसभाको अवसर परी प्रदान गर्ने गरी जनही ११ हजार १ सय ११ रुपैयाँको पुरस्कार स्थापना गरिएको हो ।
संघले संस्थागत रुपमा शैक्षिक पुरस्कार निर्णय गरेपनि अभिभावकसंगको सल्लाहमा छात्रवृत्ति वितरणका लागि अक्षय कोष स्थापना गर्ने निर्णयपनि भएको महासचिव गोपालकृष्ण गिरीले जानकारी दिए ।
छात्रवृत्ति रकम वितरणका लागि जिल्ला शिक्षा कार्यालय, निजी तथा आवासीय विद्यालय अर्गनाइजेशन प्याब्सनलगायत सरोकारवाला निकायहरुसंग आवश्यक समन्वय गरिने उनले बताए ।
यसैगरी संघले आगामी वर्षहरुमा आयोजना गर्ने मेला महोत्सवहरुमा सञ्चालन गरिने वाल उद्यानहरु समीक्षाकै स्मृतिमा समीक्षा स्मृति वाल उद्यानका नाममा सञ्चालन गर्ने निर्णय पनि भएको उनले उल्लेख गरे ।
यसैबीच पश्चिम सुर्खेतको विद्यापुरमा रहेको जनता उच्च माविको सञ्चालक समितिको सदस्यमा संघको प्रतिनिधित्व गर्ने गरी कार्य समिति सदस्य रामबहादुर गौतमलाई सिफारिश गर्ने निर्णयपनि भएको संघले जनाएको छ ।
प्रकाशित मिति: ८ पुष २०७३, शुक्रबार १७:२३
