सुर्खेत, ८ पुस । कृषि योग्य जमिनलाई व्यवस्थित गर्न वीरेन्द्रनगर नगरपालिकाले नियन्त्रण गर्न नीतिगत रुपमै योजना अघि सारेको छ ।
कृषि योग्य जमिनलाई प्लटिङ गरेर टुक्र्याउन थालेपछि वीरेन्द्रनगर नगरपालिकाले सुर्खेतमा प्लटिङ गर्न केही मापदण्ड ल्याइएको वीरेन्दनगर नगरपालिका सुर्खेतले जनाएको छ ।
नगरपालिकाको बोर्ड बैठकले सुर्खेतको लाटिकोइली, जर्वुटा, उत्तरगंगा लगायत वीरेन्द्रनगर नगरपालिकाका ग्रामीण वडाहरुमा समेत प्लटिङ गर्दा नगरपालिकाबाट अनिवार्य स्वीकृति लिनु पर्ने व्यवस्था गरेको वीरेन्द्रनगर नगरपालिकाका निमित्त कार्यकारी अधिकृत प्रकाश पौडेलले जनाएका छन् ।
सुर्खेतमा जग्गा खण्डीकरण गर्दै गएको र अव्यवस्थितरुपमा बसोवास बढ्दै गएकाले सहरी विकास मन्त्रालय र संघीय मामिला तथा स्थानीय विकास मन्त्रालयबाट जारी वस्ती विकास सहरी योजना तथा भवन सम्वन्धि आधारभूत मापदण्ड २०७२ लाई कार्यान्वयन गर्ने लागिएको उनले बताए ।
मापदण्ड विपरित जग्गा प्लटिङ गर्ने र बाटो खोल्ने कार्य भए कानुन अनुसार कार्वाही गरिने समेत उनले बताएका छन् । वीरेन्द्रनगर नगरपालिकाले जग्गा प्लटिङ गर्ने वा बाटो खोली जग्गा घडेरी बेच्ने व्यक्ति, फर्म वा संस्थाले प्लटिङ वा बाटो खोल्दा अनिवार्य नगरपालिकाबाट स्वीकृति लिनु पर्ने, नगरपालिकाबाट स्वीकृति नलिइ प्लटिङ वा बाटो खोले दुवैलाई कानुन अनुसार कार्वाही गरिने जनाएको छ ।
त्यस्ता स्थानमा निर्माण गरिएका घरहरुको नक्सा पास नहुने, ५ मिटर मोहडा वा ५ धुर जग्गा भन्दा कम क्षेत्रफल भएको जग्गालाई साँध मिलानको कार्य हुने समेत निर्णय गरेको छ । प्लटिङ जग्गाको बाटो ६ मिटर लगत कट्टा गरि किनवेच गर्न मिल्ने निमित्त कार्यकारी प्रमुख पौडेलले बताए । प्लटिङ गर्नका लागि नगरपालिकामा स्वीकृति लिनु पर्ने र नगरपालिकाले प्राविधिकको निर्णय अनुसार प्लटिङ गर्न पाउने उनको भनाई छ ।
प्रकाशित मिति: ८ पुष २०७३, शुक्रबार १६:५८
