मोरङ, ३ पुस । प्रधानमन्त्री पुष्पकमल दाहालले संविधान संशोधन प्रस्ताव विधिसम्मत तरिकाले नै टुंगो लगाउनुपर्ने बताएका छन् ।
प्रेस सेन्टर मोरङले आइतबार गरेको पत्रकार भेटघाटमा प्रधानमन्त्रीले संविधान संशोधन प्रस्तावको विरोधको बहानामा एमालेले देशको निकासलाई रोकेको बताए । उनले राजनीतिक गतिरोध अन्त्य हुने कि नहुने भन्ने कुरा एमालेमै भर परेको समेत बताए ।
विधिसम्मत तरिकाले सरकारले संशोधन प्रस्ताव दर्ता गरेकाले त्यसलाई विधिसम्मत तरिकाले नै छलफल गरेर टुंगो लगाउनुपर्ने उनको भनाइ छ । ‘अख्तियार प्रमुख लोकमानसिंह कार्कीविरुद्धको महाअभियोगको प्रस्ताव पनि संसदमा छ । संसद अवरोध गरेपछि त्यो पनि रोकियो । महाअभियोगलाई पनि छिटोभन्दा छिटो टुगो लगाउनुछ । अनि चुनावको मिति घोषणा गर्नुछ,’ उनले भने ।’
फाइल फोटो
‘प्रतिपक्षले तर्क वितर्क गरेर संशोधन प्रस्तावलाई असफल पार्छ भने त्यो उसको अधिकार हो । तर, त्यसको छिनोफानो गर्ने थलो संसद नै हो,’ दाहालले भने, ‘त्यसकारण जो साथीहरुले संसद अवरुद्ध गर्नुभएको छ उहाँहरुले अविलम्ब गैरसंसदीय, गैरलोकतान्त्रिक प्रक्रियालाई बन्द गर्नुपर्छ । आफ्नो मत संसदभित्रै राख्नुपर्छ र संसदबाट नै यसको टुंगो लगाउनुपर्छ ।’
दाहालले एमालेलाई आफ्नो मत संसदमा राख्नसमेत अग्रह गरे ।
प्रकाशित मिति: ३ पुष २०७३, आईतवार १४:३८
