काठमाडौँ, ३ पुस । काभ्रेकी ३३ वर्षीया लक्ष्मी परियारको हत्यामा संलग्नलाई कडा कारवाहीको माग गरिएको छ ।
संयुक्त विद्यार्थी छात्रा मञ्चले महिला हिंसाको अन्त्य गर्न दबाब दिने उद्देश्यले आज आयोजना गरेको ‘सडक बहस’ मा विद्यार्थी, साहित्यकार तथा सञ्चारकर्मीले दण्डहीनताले महिलामाथि हिंसा हुने गरेकामा चिन्ता व्यक्त गरीन् ।
मञ्चका अध्यक्ष तथा अनेरास्ववियुका अध्यक्ष नवीना लामाले सो घटना अमानवीय र निन्दनीय रहेको बताउँदै त्यसको निष्पक्ष छानबिन गरी दोषीलाई अविलम्ब कानुनी कारवाही गर्न माग गरीन् ।
नेविसङ्घकी नेत्री लक्ष्मी खतिवडाले सभ्य समाज निर्माणका लागि महिलामाथि हुने हिंसा तथा दुव्र्यवहारलाई न्यूनीकरण गर्नुपर्नेमा जोड दिइन् ।
सञ्चारिका समूहका कोषाध्यक्ष यशोदा अधिकारीले दण्डहीनताले महिला हिंसाका घटना बढेको बताउँदै मञ्चले सञ्चालन गर्ने अभियानलाई सफल बनाउन सबै एक जुट हुनुपर्ने बताइन् ।
गायिका नीलिमा पुनले हिंसाविरोधी गीत तथा नवीना घिमिरेले कविता वाचन गरेकाे सो कार्यक्रममा घटनास्थलमा पुगेर अध्ययन गरिएका प्रतिवेदनका बारेमा जानकारी गराइएको थियो । गत मङ्सिर २० गते साँझ स्थानीय बुङथलीस्थितविद्यालयको प्राङ्गणमा शिक्षक हिरा लामा र काहिँली तामाङले कुटपिट गरी परियारलाई दिसापिसाब समेत खुवाइएको मङ्सिर २४ गते उनको मृत्यु भएको मञ्चले आरोप लगाएको छ । रासस
प्रकाशित मिति: ३ पुष २०७३, आईतवार १३:५७
