काठमाडौं, १ पुस । नेपाली कांग्रेसका नेता डा. रामशरण महतले संसदमा दर्ता भएको संविधान संशोधन प्रस्तावलाई तत्काल थाँती राखेर स्थानीय निकायको निर्वाचन गर्नुपर्ने बताएका छन् ।
शुक्रबार रिपोर्टर्स क्लब नेपालले आयोजना गरेको साक्षात्कारमा बोल्दै नेता डा. महतले भने, ‘संविधान संशोधन प्रस्तावलाई लजिकल ईण्डमा पुर्याउनुपर्छ, प्रस्तावलाई संवैधानिक प्रक्रियामा लैजानुपर्छ, यसको विरोधमा संसद नै अवरुद्ध गर्नु गलत हो, एमालेले गल्ती गरिरहेको छ, संशोधन प्रस्तावमाथि प्रतिपक्षी दलले छलफल नै गर्न नदिनु बेठिक हो ।’ महतले प्रतिपक्षी दल एमालेले भने जस्तो संशोधन प्रस्ताव फिर्ता लिन पनि उचित नहुने जिकिर गर्दै भने, ‘अहिले देखिएको संसदको गत्यावरोधलाई अन्त्य गर्नको लागि पनि संशोधन प्रस्तावलाई थाँती राखेर निर्वाचनमा जानुको विकल्प छैन् ।’
पूर्वमन्त्री समेत रहेका नेता महतले भने, ‘अहिले संशोधन प्रस्ताव फिर्ता लिनु हुँदैन, यो उचित पनि छैन, बरु अब यसलाई थाँती राखेर अन्य अति आवश्यक ऐन÷कानूनहरुलाई अघि बढाउनुपर्छ, निर्वाचन सम्बन्धी विद्येयक, महाअभियोगको प्रस्तावलाई अघि बढाउनुपर्छ, अहिले संसदमा विभिन्न ऐन तथा कानूनहरु छन्, तिनीहरुलाई निश्कर्षमा पुर्याउनुपर्छ, र अब चुनावको मिति घोषणा गर्नुपर्छ ।’
उनले स्थानीय तहलाई अहिलेको संविधानले धेरै अधिकार दिएको उल्लेख गर्दै भने, ‘अहिलेको संविधानले स्थानीय तहलाई धेरै अधिकार दिएको छ, स्थानीय तह जति अधिकार त जिल्लालाई पनि छैन् ।’ महतले अधिकारको उपयोग ठीक ढंगले हुनुपर्नेमा जोड दिए ।
नेता महतले स्थानीय तहको पुनर्संरचनाको लागि आयोगले काम गरिरहेको जानकारी दिँदै भने, ‘आयोगले काम त गरिरहेको छ, तर यसलाई विवादमा पार्ने काम कसैले गर्नुहुँदैन, कतिपय जिल्लामा अझै विवाद छ, तराईका ८ जिल्लामा आयोग अहिलेसम्म प्रवेश नै गर्न सकेको छैन्, त्यसैले जबरजस्ती आयोगलाई काम गर्न प्रेसरपनि दिनुभएन, जनताको जनमत विपरित कुनै पनि प्रदेशको सिमांकन हेरफपेर गर्नुहुँदैन् ।’
एमालेले भनेजस्तो अहिले नै केन्द्रिय संसदको चुनाव गर्न नहुने नेता महतले जिकिर गरे । उनले भने, ‘अहिले समय बाँकी छ, ०७४ माघ ७ गतेसम्म तीन वटै निकायको निर्वाचन गर्नुपर्ने भएकोले समय बाँकी छ ।’ स्थानीय निकायको निर्वाचन नै अहिलेको आवश्यकता भएको उनको भनाई थियो ।
प्रकाशित मिति: १ पुष २०७३, शुक्रबार १५:५९
