भक्तपुर, १ पुस । नेपाल मजदुर किसान पार्टीका अध्यक्ष नारायणमान बिजुक्छेले छिट्टै भारतको इशारामा सरकारको समीकरण बद्लिने बताएका छन् ।
रफत सञ्चार क्लबले आज आयोजना गरेको साक्षात्कार कार्यक्रममा बोल्दै बिजुक्छे भारतको इशारामा केपी ओलीको नेतृत्वमा सरकारको प्रस्ताव आउने र ओलीले अस्वीकार गरे शेर बहादुर देउवाको नेतृत्वमा सरकारको समीकरण देखिने बताएका हुन् ।
नेपालका नेताहरुलाई जति बेला चाह्यो त्यति बेला भारतले हत्या गर्न सक्ने भन्दै उनले विगतमा नेपालमा गरिएका हत्याले यसलाइ पुष्टि गरेको र आफ्नो पायकमा काम नगर्ने नेताहरुको उसले जति बेला पनि हत्या गर्न सक्ने टिप्पणी गरे ।
सरकार स्थानीय तहको निर्वाचन नगर्ने योजनामा रहेको भन्दै बिजुक्छेले सरकारकै कारण स्थानीय तहको निर्वाचन नहुने दावीका साथ स्थानीय तहको निर्वाचन गर्ने बहाना गरि संसदको निर्वाचन गर्ने तयारीमा जुटेको बताए ।
उनले दिल्ली घोषणा पत्रलाई आधार मान्दा अव दुई वटा नागरिकता भएकाहरुले नेपालका पार्टीहरुलाई ठूलो मात्रामा चन्दा दिने सुविधा जसरी प्रदान गरिँदै छ यसले अव नेपालमा एन आर एन र अंगिकृत नागरिकता भएकाले सरकार चलाउने बताए ।
नेपालका लागि भारतीय राजदुत रञ्जित रेलाई भारतले नैतिकताको आधारमा भएपनि फिर्ता बोलाउनु पर्ने तर्फ ध्यान नजानु कुटनीति मर्यादाको विपरित काम गरेको र हेपाहा प्रवृत्ति भएको उनले बताए ।
देशका हरेक गतिविधिका बारे पूर्व जानकारी लिनु पर्ने गुप्तचर विभाग असफल भएको र उनीहरुको गतिविधिकै कारण नेपालमा भारतले जति बेला चाह्यो त्यति बेला हरेक काम गर्न सफल रहेको भन्दै नेपालको गुप्तचर विभाग सक्षम रहे भारतले नेपालमा गर्ने गतिविधिको प्रतिउत्तर दिने सक्ने उनले बताए ।
प्रकाशित मिति: १ पुष २०७३, शुक्रबार १५:३६
