लमजुङ, २९ मंसिर । जलविद्युत निर्माणमा लगानीमैत्री वातावरण बनाइएको लमजुङलाई ‘हाइड्रो मोडेल नमुना जिल्ला’ घोषणा गर्न विशेष पहल गरिने भएको छ ।
फाइल फोटो
पाँचौ लमजुङ महोत्सवको अवसरमा गरिन लागिएको जलविद्युत सम्बन्धी कार्यशाला गोष्ठीबाट जिल्लालाई हाईड्रो मोडेल जिल्ला घोषणा गर्न विशेष पहल गरिने भएको हो । लमजुङमा मंगलबार आयोजित कार्यशाला गोष्ठीको पूर्व तयारी बैठकमा सहभागी सांसद्, राजनीतिक दलका नेता, प्रशासक तथा अन्य सरोकारवालाहरुले जिल्लालाई हाइड्रो मोडल जिल्ला घोषणाका लागि सरकारसँग विशेष पहल गर्ने निचोड निकालेका हुन ।
कार्यशाला गोष्ठीमा जिल्लामा भएको जलविद्युतको सम्भावना, हाल निर्माण भइरहेका आयोजना, जलविद्युत निर्माणमा देखिएका समस्याबारे उर्जामन्त्रालय, विद्युत प्राधिकरणका विशेष व्यक्तित्वहरुलाई जानकारी गराइने भएको छ । सो अवसरमा विभिन्न तीन वटा कार्यपत्रहरु प्रस्तुत गरि जलविद्युतको क्षेत्रमा भएका गतिविधिहरु प्रस्तुत गरिने भएको छ ।
विद्युत निर्माणका क्रममा देखिएका रोजगारी, जग्गा अधिकरण, पूर्वाधार विकास, शेयर, प्रभावित क्षेत्रको वर्गिकरण लगायतका विषयमा भएका अस्प्रष्टताबारे जानकारी गराउनुपर्ने सांसद् जमीन्द्रमान घलेले बताए । उनले प्रभावित गाविसहरुको बहानामा अवरोध गर्ने परम्पराका कारण जिल्लाको जलविद्युत क्षेत्रको विकास हुन नसकेको समेत बताए ।
२०४९ सालमा बनेको जलविद्युत ऐन धेरै पुरानो भएकाले नयाँ ऐन ल्याउन पहल भैरहेको र त्यसको ड्राफ्ट बन्ने तयारीमा रहेकाले त्यहाँ समावेश हुनेगरि समस्याहरुलाई प्रस्तुत गर्नुपर्ने सांसद् घलेले बताए ।
स्थानीय विकास अधिकारी शेखर पौड्यालले कार्यपत्र प्रस्तुत गर्दै जिल्लामा जलविद्युतको क्षेत्रमा भैरहेका प्रगति, देखिएका समस्या, समाधान गर्नुपर्ने विषयहरुबारे जानकारी गराएका थिए ।
जिल्लामा विद्युत निर्माण गर्दा पु¥याउनुपर्ने पूर्वाधार विकास, प्रशारण लाइन निर्माणको ढिलाईले प्रवद्र्धकहरु निराश बन्ने गरेको भन्दै यसमा विशेष ध्यान दिन गोष्ठीमा सरकारको ध्यानआकर्षण गरिने स्थानीय विकास अधिकारी पौड्यालले बताए । उनले विद्युत रोयल्टी बाँडफाँडमा समेत समस्या रहेकाले यसतर्फपनि ध्यानआकर्षण गरिने बताए ।
लमजुङ महोत्सवको कार्यशाला गोष्ठी उपसमितिले पुस २ गते जलविद्युतमा लगानीमैत्री वातावरण र नमुना हाइड्रो मोडल जिल्ला बनाउने हेतुले कार्यशाला गोष्ठी आयोजना गरेको छ । कार्यक्रममा सांसद्हरु, उर्जा मन्त्रालयका सविच, सहसचिव, प्राधिकरणका कार्यकारी प्रमुख, स्वतन्त्र उर्जा उत्पादक संघ (इपान) का पदाधिकारी लगायतको उपस्थिति रहने कार्यशाला गोष्ठी उपसमितिका संयोजक मृगेन्द्र घिमिरेले जानकारी दिए ।
लमजुङ उद्योग बाणिज्य संघका अध्यक्ष एवं महोत्सव मुल आयोजक समितिका संयोजक रामकुमार श्रेष्ठको अध्यक्षतामा भएको पूर्व तयारी बैठकमा निमित्त प्रजिअ तीर्थबहादुर अधिकारी, नेपाली काँग्रेसका सभापति भेषबहादुर पौडेल, नेकपा एमालेका सचिव कृष्णप्रसाद अधिकारी, माओवादी केन्द्रका नेता मधु अधिकारी, राप्रपाका नेता बालचन्द्र श्रेष्ठ, नयाँ शक्ति नेपालका संयोजक राजु थापा, नेकपा–माओवादीका सुजन अधिकारीलगायतले विभिन्न सुझावहरु राखेका थिए ।
प्रकाशित मिति: २९ मंसिर २०७३, बुधबार ०८:३३
