सुर्खेत, १८ मंसिर । नेकपा एमालेका वरिष्ठ नेता तथा पूर्वप्रधानमन्त्री झलनाथ खनालले एमालेले भनेको नमान्दा अहिले देश संकटपूर्ण अवस्थामा गुज्रीरहेको बताए ।
वीरेन्द्रनगरमा शुक्रवार भएको प्रदेश स्तरीय बृहत कार्यकर्ता भेलामा वरिष्ठ नेता खनालले अहिलेको सरकारले कसैसँग सहमति नगरेर संविधान संशोधनको दुस्प्रयत्न गरेको बताएका छन् । उनले भने ‘अहिलेको सरकारले कसैसँग छलफल नगरेर संविधान संशोधनको दुस्प्रयत्न गरिरहेको छ र यो संशोधन हामी प्रतिकार गर्छाै ।’
अहिलेको सरकारले स्वार्थका लागि संविधान संशोधन गर्न लागि परेको र अहिले संविधान संशोधन गर्ने बेला नभएको वरिष्ठ नेता खनालले बताए । संविधानलाई जो पायो त्यही र जहिले पायो त्यहिले संशोधन गर्न नपाइने नेता खनालले बताए ।
वरिष्ठ नेता तथा पूर्वप्रधानमन्त्री खनालले प्रदेश नम्वर ५ टुक्रयाउने कुरा आघात रहेको बताए । उनले माओवादीले जातीयता भड्काउने काम गरेको समेत आरोप लगाएका छन् । उनले भने ‘लिम्बुलाई लिम्बुवान राज्य बनाउनु पर्छ र खम्वालाई खम्बावान राज्य बनाउनु पर्छ भनेर जातीयता भड्काउने काम माओवादीले गरेको छ् ।’
वरिष्ठ नेता खनालले अहिले सरकाले गरेको अङ्गिकृत नागरिकताको प्रस्तावमा एमालेको विरोध रहेको जनाएका छन् । उनले विदेशी नागरिकलाई नागरिकता दिने काम गलत रहेको बताए । नेता खनालले भने ‘अहिलेको सरकारले जुन प्रकारका संशोधनका कार्य गरेको छ ति कुनै पनि मान्य छैन् ।’
गरिबी, बेरोजगारी, अशिक्षा उन्मुलन गर्न देशलाई नयाँ युगले अगाडि बढाउनु पर्ने र जनताले चाहे सबै कुरामा परिवर्तन ल्याउन सकिने समेत वरिष्ठ नेता तथा पुर्वप्रधानमन्त्री खनालले बताए ।
यसैगरी ६ नम्बर प्रदेशका संयोजक युवराज ज्ञवालीले ६ नम्वरको ढाँचालाई केन्द्रीत गरेर सबै कामहरु अघि बढाइरहेको जानकारी दिए ।
दुई दिनसम्म चल्ने प्रदेश स्तरीय बृहत कार्यकर्ता भेलामा १० जिल्लाका एमाले कार्यकर्ता गरी करिब ५०० कार्यकर्ताको उपस्थिति रहेको प्रदेश नम्वर छ का सहसंयोजक यमलाल कंडेलले जानकारी दिए । कार्यक्रममा वरिष्ठ नेता तथा पूर्वप्रधानमन्त्री झलनाथ खनाल, एमाले महासचिव ईश्वर पोखरेल, पोलिटव्यूरो सदस्य प्रकाश ज्वाला, पोलिटव्यूरो सदस्य गोरख बोगटीले प्रशिक्षण दिने सहसंयोजक कंडेलले जानकारी दिए ।
प्रकाशित मिति: १८ मंसिर २०७३, शनिबार ०९:०५
