काठमाडौं, ३ मंसिर । नेकपा (क्रान्तिकारी माओवादी) निकट क्रान्तिकारी पत्रकार महासंघले नेपाल पत्रकार महासंघलाई फुटाउने चेतावनी दिएको छ ।
क्रान्तिकारी पत्रकार महासंघका अध्यक्ष इन्द्र राउतको नेतृत्वमा शुक्रबार पत्रकार महासंघको सञ्चारग्रामस्थित मुख्यालयमा पुगेको टोलीले यस्तो चेतावनी दिएको हो ।
नेपाल पत्रकार महासंघका अध्यक्ष डा.महेन्द्र विष्टसँगको भेटमा आफूहरूलाई निषेध गरेर जान खोजे क्रान्तिकारी पत्रकार महासंघले वैकल्पिक महासंघ बनाएर अघि बढ्ने चेतावानी दिएको अध्यक्ष राउतले बताएका छन् ।
महासंघका अध्यक्ष विष्टलाई पाँच बुँदे ‘ध्यानाकर्षण पत्र’ बुझाउँदै अध्यक्ष राउतले यस्तो चेतावानी दिएका हुन् ।
भेटमा क्रान्तिकारी पत्रकार महासंघका महासचिव केशरमणि कटुवालले ध्यानाकर्षण पत्र बाचन गरेर सुनाएका थिए ।
उपाध्यक्ष नारायण पंगेनीले गैरपत्रकारहरूको सदस्यता खारेजी गर्न र नेपाल पत्रकार महासंघलाई सक्कली श्रमजीवी पत्रकारहरूको साझा संगठन बनाउन माग गरेका थिए ।
पत्रकार महासंघभित्रको कमीकमजोरी सच्याउँदै महासंघलाई श्रमजीवी पत्रकारहरूको साझा (छाता) संगठन बनाएर लैजानका लागि दबाब दिएको अध्यक्ष राउतले उल्लेख गरेका छन् ।
क्रान्तिकारी पत्रकार महासंघले नेपाल पत्रकार महासंघलाई बुझाएको ध्यानाकर्षण पत्रको पूर्ण पाठ यस्तो छ :-
‘श्री अध्यक्ष ज्यू
नेपाल पत्रकार महासंघ, केन्द्रीय कार्यालय, संचारग्राम, तिलगंगा, काठमाडौं ।
विषय : ध्यानाकर्षण पत्र ।
अध्यक्ष ज्यू,
‘क्रान्तिकारी पत्रकार महासंघ’ श्रमजीवि पत्रकारहरुको नेतृत्वदायी संगठन हो । स्थापनाकालदेखि नै यस महासंघले श्रमजीवि पत्रकार ऐनको कार्यान्वयन, पे्रस तथा अभिव्यक्ति स्वतन्त्रताको ग्यारेण्टी, सम्पादकीय स्वतन्त्रता, लोककल्याणकारी विज्ञापनको समानुपातिक वितरण, साना लगानीका तथा जनपक्षीय मिडियाहरुको संरक्षण र संवद्र्धन, श्रमजीवि पत्रकारहरुको पेशागत तथा भौतिक सुरक्षाको ग्यारेण्टी, मिडियामा वैदेशिक र अपारदर्शी लगानीलाई निषेध, मिडियाका कन्टेन्टको समावेशिकरण, निष्पक्ष, मर्यादित, जिम्मेवार र जवाफदेहीपूर्ण पत्रकारितालगायतको पक्षमा खह्रोरुपमा वकालत गर्दै आएको छ ।
हाम्रो महासंघ ‘नेपाल पत्रकार महासंघ’लाई छाता संगठन मान्दछ । हाम्रो संगठनले उठाएका उल्लेखित विषय पनि नेपाल पत्रकार महासंघले पनि आफ्नो कार्यसूचिमा राखोस् र त्यसको प्रभावकारी कार्यान्वयनमा नेतृत्वदायी भूमिका निर्वाह गरोस् । हामी गम्भीर रुपले ध्यानाकर्षण गराउन चाहन्छौं । यसका अतिरिक्त निम्न विषयहरुमा हामीले विशेष ध्यानाकर्षण गराउन आवश्यक ठानेका छौं ।
१. हाम्रो संगठनलाई नेपाल पत्रकार महासंघको नेतृत्वले वेवास्ता गर्दै आएको छ र प्रायः निर्णय प्रक्रिया, विविध सरोकार राख्ने कार्यक्रममा हाम्रो संगठनलाई सहभागी गराएको छैन । हाम्रो संगठनप्रतिको निषेधकारी व्यवहार सच्याइयोस् र नेपाल पत्रकार महासंघलाई साँच्चैको छाता संगठनको भूमिकामा स्थापित गरियोस् ।
२. नेपाल पत्रकार महासंघका हरेक निर्णय प्रक्रियामा तीन ठूला राजनीतिक पार्टीहरु नेपाली कांग्रेस सम्बद्ध प्रेस युनियन, नेकपा (एमाले)सम्बद्ध प्रेस चौतारी र नेकपा (माओवादी केन्द्र) सम्बद्ध प्रेस सेन्टरको ‘सिन्डिकेट’ लादिएको छ । हाम्रो संगठन यसको कडा शब्दमा विरोध गर्दछ । नेपाल पत्रकार महासंघलाई तीन ठूला संगठनका कार्यकर्ताहरुको भर्तिकेन्द्र र पेवा नबनाइयोस् । जोडदार माग गर्दछ ।
३. नेपाल पत्रकार महासंघको आवधिक चुनाव नजिकिदैछ । महासंघले शुद्धीकरण अभियान चलाओस् । गैरपत्रकार, निष्क्रिय पत्रकार, उद्योगी, व्यापारी, कर्मचारी, राजनीतिक पार्टीका नेता कार्यकर्ताहरु (जो प्रत्यक्षरुपले पत्रकारिता पेशामा संलग्न छैनन्)लगायतको सदस्यता खारेज गरियोस् । र, नेपाल पत्रकार महासंलाई सक्कली (क्रियाशिल) पत्रकारहरुको साझा संगठन बनाइयोस् ।
४. देशैभरबाट धेरै क्रियाशिल र योग्यता पुगेका पत्रकारहरु नेपाल पत्रकार महासंघको सदस्यता लिनबाट बञ्चित भएका छन् । आफ्नो अनुकूलतामा नयाँ सदस्यताको लागि आवेदन खुल्ला गर्ने र बन्द गर्ने नगरियोस् । आस्थाको आधारमा भेदभाव र बाधा अड्चन खडा नगरियोस् ।
५. महासंघको आसन्न चुनावमा गरिने अमर्यादित गतिविधि र अपारदर्शी चलखेललाई निषेध गरियोस् । पेशागत हिसाबले अमर्यादित ठानिने ‘जाँड रक्सी’को प्रयोगलाई प्रतिबन्ध लगाइयोस् ।
अन्तमा, हाम्रो संगठनले उठाएका उल्लेखित विषयहरु सम्बोधन नगरिने, हामीप्रतिको अपमानपूर्ण र निषेधकारी व्यवहारलाई नसच्याइने हो र सहकार्यको ढोका बन्द गरिने हो भने क्रान्तिकारी पत्रकार महासंघ वैकल्पिक महासंघको रुपमा अगाडि बढ्न बाध्य हुने पनि यसै ध्यानाकर्षण पत्रमार्फत् अवगत गराउन चाहन्छौं ।’
इन्द्र राउत
अध्यक्ष
प्रकाशित मिति: ३ मंसिर २०७३, शुक्रबार १४:५६
