काठमाडौँ, २८ कात्तिक । बबरमहलस्थित नेपाल कला परिषद्मा जारी पहिलो अन्तर्राष्ट्रिय नेपाल कला सङ्गोष्ठी अन्तर्गत स्थलगत ‘कला कार्यशाला’ आज सुरु भएको छ ।
उक्त कार्यक्रममा नेपाल, भारत, पाकिस्तान, श्रीलङ्का र लेबनानका कलाकारले प्रकृति, सौन्दर्य, सामाजिक जनजीवनका विविध पक्ष तथा विभिन्न सम्पदास्थलका बारेमा चित्र सिर्जना गरेका छन् ।
त्यहाँ सिर्जना गरिने कलाकृति नेपाल कला परिषद्, वाग्मती कला सङ्ग्रहालयलाई प्रदान गरिने छ । कार्यशालामा केही विदेशी कलाकारका साथै नेपाल ललितकला प्रज्ञा–प्रतिष्ठानका पूर्वकुलपति किरण मानन्धर, सोसाइटी अफ मोर्डन आर्टसका अध्यक्ष शङ्करराजसिंह सुवाल, कलाकार हरि खड्का, नरेश सैँजु लगायत सहभागी छन् ।
नेपाल बन्द आह्वानका प्रभावले सवारी साधान सामान्य दिनमा भन्दा केही कम सञ्चालन हुँदा केही विदेशी कलाकार आफू बसेको होटलबाट हिँडेर कार्यशालामा आएका छन् ।
स्वदेशी तथा विदेशी कलाकार कार्यक्रममा सहभागी हुन आउने क्रम जारी छ । यसैगरी ‘नेपाल कला परिषद्’, ‘न्यु आर्टस् सर्कल’ र भारतको ‘एसएमडी फाउन्डेसन’को संयुक्त आयोजनामा शनिबारदेखि सोमबारसम्म जारी रहने उक्त सङ्गोष्ठीमा स्वदेशी तथा तथा विदेशी कलाकारका गरी ९५ चित्र पनि प्रदर्शनीमा राखिएका छन् ।
न्यु आर्टर्स सर्कलका उपाध्यक्ष सैँजुले विभिन्न मुलुकका कलाकारको सहभागितामा भएको कार्यशालामा सिर्जना गरिने कलाकृतिले राष्ट्रिय तथा अन्तर्राष्ट्रिय बजारमा कला प्रवद्र्धन गर्न सकिने बताउँदै कलाकारका बीचमा सहयोग तथा अनुभव आदानप्रदानका लागि कार्यक्रम उपयोगी हुने विचार व्यक्त गरे । रासस
