कालीकोट, ८ कात्तिक । नेपाली कांग्रेसका पूर्व महामन्त्री प्रकाशमान सिंहले वर्तमान राजनीतिक परिस्थिति निर्णायक मोडमा रहेको बताएका छन् । उनले संविधान कार्यान्वयनको चरणमा रहेको हुनाले वर्तमान राजनीतिक निर्णायक मोडमा पुगेको बताएका हुन् ।
नेपाली कांग्रेस कालीकोटले आज मान्मा आयोजित आमसभामा बोल्दै कांग्रेस केन्द्रीय सदस्य समेत रहेका कांग्रेस नेता सिंहले कांग्रेसले निर्णायक भूमिका निर्वाह गर्दै आएको इतिहास स्मरण गर्दै संविधान निर्माणमा जस्तै कार्यान्वयनका पनि निर्णायक भूमिका निर्वाह गर्नु पर्ने बेला आएको बताए ।
कांग्रेस नेता सिंहले हिमाल, पहाड, र तराई जहांबाट आवाज उठेपनि उचित र जाहेज मागलाई सम्बोधन गर्दै सम्पूर्ण राजनीतिक दलहरुको सहभागितामा वार्ता र संवादको माध्यमबाट समस्याको गरी निर्वाचनको वातावरण तयार गर्न कांग्रेसले नेतृत्व लिनु पर्ने बताए ।
निर्वाचन अघि गाउँ तहका कार्यकर्ताको भावना बुझ्ने क्रममा ६ नम्बर प्रदेशको आज कालीकोटको मान्म पुगेका कांग्रेस नेता सिंहले राजनीतिक स्थिरताले मात्र विकास निर्माण संभव हुने भएकाले राजनीतिक स्थिायीत्वका लागि निर्वाचन अपरिहार्य भएको बताए ।
अहिले सर्वाधिक चर्चा र चासोको विषय बनेको महाअभियोग बारे चर्चा गर्दै कांग्रेस नेता सिंहले भने, महाअभियोग प्रस्ताव संसदमा प्रवेश गरी सकेको छ, कांग्रेसले त्यसलाई प्रक्रियागत रुपमा टुंगोमा पुर्याएरै छोड्छ, पछाडि हट्दैन ।
कालीकोटकै आमसभालाई सम्बोधन गर्दै सहकारी तथा गरिबी निवारण मन्त्री हृदयराम थानीले पूर्वाधार विकासमा कालीकोट पछाडि परेको हुनाले वर्षौ देखि अलपत्र अवस्थामा रहेको कोटवाडा विमानस्थल पुरा गर्न पहल गर्ने प्रतिवद्धता जनाए । उनले कर्णालीको सडक यातायातलाई सहज बनाउन सुर्खेत जुम्ला सडक विस्तार गर्नु पर्नेमा जोड दिए ।
कांग्रेस केन्द्रीय सदस्य समेत रहेका मन्त्री थानीले ६ नम्बर प्रदेश सुनको टुक्रा बन्ने साधन र स्रोत भएकाले अहिले विकट र कमजोर प्रदेश भएपनि ६ नम्बर प्रदेशका जनताको भविश्व उज्जवल भएको बताए ।
कालीकोट कांग्रेसका सभापति हर्ष वमको सभापतित्वमा भएको उक्त कार्यक्रममा पूर्व मन्त्री शिवराज जोशी, सांसद रिता शाही लगायतले पूर्वाधार विकास र आर्थिक समृद्धि तर्फ जोड दिनु पर्ने धारणा राखेका थिए ।
प्रकाशित मिति: ८ कार्तिक २०७३, सोमबार १९:३६
