बागलुङ, ८ कात्तिक । अभिभावक गुमाएका बालबालिकालाई आश्रय दिन जिल्लामा बालगृह सञ्चालन हुने भएको छ ।
जिल्ला बाल कल्याण समितिले बालगृह सञ्चालनको गृहकार्यमा जुटेको छ । समितिको आफ्नै भवनमा बन्ने सो बालगृहमा १० जना बालबालिका राख्न सकिन्छ ।
दुःख पाएका, बेसहारा र सडक बालबालिकाको संरक्षणका लागि बालगृह खोल्न लागिएको समितिका अध्यक्ष एवम् बागलुङका प्रमुख जिल्ला अधिकारी भागिरथ पाण्डेयले बताए ।
यसका लागि समितिका सदस्य केवी रानामगरको संयोजकत्वमा बालगृह सञ्चालन तथा व्यवस्थापन समिति पनि गठन गरी काम अघि बढाइएको छ । तत्काल सडकबाट उद्धार गरिएका चारजना बालिकालाई बालगृहमा राख्ने तयारी भइरहेको समितिका सदस्य एव्म ‘सेभ द् युथ’ बागलुङका अध्यक्ष मनिष रायमाझीले बताए । समितिको भवनमा हाल स्थानीय शान्ति समितिको कार्यालय बस्दै आएको छ ।
उक्त कार्यालयलाई केही कोठामात्र भाडा दिएर बाँकी कोठा बालगृहका लागि प्रयोग गरिने जनाएको छ । खाना, पठनपाठन, आवास, मनोरञ्जन लगायतका आधारभूत सुविधासहितको बालगृह सञ्चालन हुने समितिले जनाएको छ ।
“आवास, भान्सा लगायतको तयारी भइरहेको र केही दिनमै बालगृह सञ्चालनमा आउँछ”, सदस्य रायमाझीले भने— समितिले सरकारी र गैरसरकारीस्तरमा संयोजन गरी बालगृहको व्यवस्थापन र सञ्चालनका लागि आवश्यक सहयोग जुटाउने भएको छ ।
“बालगृह दिगो व्यवस्थापनका लागि सबै पक्षसँग समन्वय गरेर अघि बढ्छौँ”, प्रजिअ पाण्डेयले भने, “यसबाट भविष्यमा बालबालिकासहित महिलालाई समेत सेवा दिने हाम्रो लक्ष्य छ ।” अञ्चल सदरमुकाम रहेको बागलुङमा एउटा पनि बालगृह नभएपछि आफूले विशेष पहल गरेर स्थापना गर्न लागेको उनको कथन छ ।
