काठमाडौ २१ असोज । अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्की दसैंपछि सर्वोच्च अदालतको सम्पर्कमा आउने भएका छन् । कार्कीका कानुन व्यवसायीले दिएको जानकारीअनुसार कार्की अहिले विदेशमा रहेकाले दसैंपछि आफैंले सर्वोच्चको म्याद बुझ्नेछन् । प्रमुख आयुक्त कार्कीको नियुक्ति विषयमा सर्वोच्च अदालतले पुनः सुनुवाइ गर्ने भएपछि कार्कीलाई अदालतले बोलाएको थियो ।
तर, उनी अहिलेसम्म सम्पर्कमा नआएपछि अदालतले राजधानीको नयाँ बानेश्वरस्थित कार्कीको घरमा बुधबार १५ दिने सूचना टाँस गर्न तामेल्दार शम्भु खत्रीसहितको टोली पठाएको थियो ।
कसैको घरमा अदालतको सूचना टाँस्दा सम्बन्धित वडा सचिवले मुचुल्का उठाउनुपर्ने हुन्छ । तर, कार्कीको घरमा सूचना टाँस्न जाँदा वडा नम्बर १० की सचिव सरिता राई भने अदालतका कर्मचारीको सम्पर्कमै आइनन् ।कमाण्डर पोस्ट दैनिकमा खबर छ ।
कार्कीको घर भाडामा लगाएकाले उनका कोही आफन्त त्यहाँ भेटिएनन् । मुलुकी ऐनको अदालती बन्दोबस्तको ११० मा घरमा सूचना टाँस गर्न नमिले सार्वजनिक सञ्चार माध्यमबाट सूचना प्रकाशन गर्ने व्यवस्था छ ।
‘प्रमुख आयुक्तज्यू लुकेको होइन’ लोकमानका कानुन व्यवसायीले नाम नलेखिदिन आग्रह गर्दै भने, ‘उहाँ राज्यको संवैधानिक अंगमा बस्नुभएको व्यक्ति हो । उहाँलाई कार्यालयमा पनि सूचना बुझाउन सक्ने अवस्था छ । तर, त्यसरी गरिएन । उहाँलाई बद्मान गर्न खोजिएको हो ।’
उनका अनुसार कार्की अहिले काम विशेषले विदेशमा रहेकाले दसैंपछि सूचना बुझ्नुहुनेछ । कार्की पुनरावलोकनबाट नडराएको बताउँदै कार्कीका कानुन व्यवसायीले भने, ‘उहाँले काम विशेषले त्यसतर्फ ध्यान दिन सक्नुभएको छैन ।’ कार्कीको नियुक्ति कानुनसम्मत नभएको उल्लेख गर्दै अधिवक्ता ओमप्रकाश अर्यालले सर्वोच्च अदालतमा २९ वैशाख ०७० मा रिट दायर गरेका थिए । सर्वोच्चले ८ असोज ०७१ मा रिट खारेज गरेको थियो । अधिवक्ता अर्यालले पुनरावलोकनका लागि रिट दायर गर्दा सर्वोच्चले दुवै पक्षलाई म्यादको पत्र पठाएको थियो । जसमा अधिवक्ता अर्यालले पत्र बुझिसकेका छन् भने कार्कीले बुझ्न अस्वीकार गर्दै आएका छन् ।
प्रकाशित मिति: २१ आश्विन २०७३, शुक्रबार ०६:३१
