काठमाडौ १० असोज-सरकारले बन्द भएको १६ वर्षपछि हेटौंडा कपडा उद्योग पुनः सञ्चालनमा ल्याउन आवश्यक तयारी थालेको छ । उद्योग मन्त्रालय वस्तुस्थितिको अध्ययनका लागि समिति गठन गर्दै उद्योग सञ्चालनको तयारीमा जुटेको हो । अर्थशास्त्री एवम् राष्ट्रिय योजना आयोगका पूर्वसदस्य डा. पुष्कर वज्राचार्यको संयोजकत्वमा मन्त्रालयले ८ सदस्यीय समिति गठन गरेको छ ।
समितिलाई आवश्यक अध्ययन गरी १५ दिनभित्र सुझावसहितको प्रतिवेदन पेश गर्न जिम्मेवारी दिइएको मन्त्रालयले जानकारी दिएको छ । मन्त्रालयका अनुसार समितिले उद्योग पुनः सञ्चालनका लागि उपयुक्त मोडालिटी, प्रक्रिया, मेशिन र पूर्वाधारको अवस्था, उद्योगमा हुनसक्ने लगानीका विकल्पहरू र उद्योगबाट हुने उत्पादनका लागि बजारको सम्भाव्यतासमेतको अध्ययन गरी सरकारलाई प्रतिवेदन बुझाउनेछ ।
समितिमा सदस्यका रूपमा अर्थ मन्त्रालयका सहसचिव हरिशरण पुडासैनी, उद्योग मन्त्रालयका सहसचिव यमलाल भुसाल, नेपाली सेना, नेपाल प्रहरी र सशस्त्र प्रहरीको तर्फबाट एक/एक जना प्रतिनिधि एवम् निजीक्षेत्रबाट रामएकवाल यादव, अजय मुडभरी र विना गौतम श्रेष्ठ सदस्यका रूपमा रहेका छन् ।
नेपाल औषधि लिमिटेड सञ्चालनमा ल्याउने निर्णय गरेको केही दिनपछि सरकारले हेटौंडा उद्योग सञ्चालनमा ल्याउन पहल थालेको हो । मन्त्रालयले गएको भदौ २६ गते उद्योग क्षेत्र सुधार कार्ययोजना सार्वजनिक गर्दै सरकारी स्वामित्वमा रहेका बन्द उद्योगलाई सञ्चालनमा ल्याउने बताएको थियो । त्यसैअनुसार पहिलो चरणमा दुईओटा उद्योगको काम अगाडि बढेको हो ।
यसबाहेक वीरगञ्ज चिनी कारखाना, बुटवल धागो कारखाना, नेपाल मेटल कम्पनी लिमिटेड, कृषि औजार कारखाना र गोरखकाली रबर उद्योग, जनकपुर चुरोट कारखाना र ओरिण्ड म्याग्नेसाइट उद्योगसमेत सञ्चालनमा ल्याउने मन्त्रालयको योजना छ ।
डा. बाबुराम भट्टराई अर्थमन्त्री हुँदा सो उद्योगलाई पुनः सञ्चालनमा ल्याउन सरकारद्वारा ९ करोड रुपैयाँ अनुदान दिइएको थियो । तर, उद्योगको मर्मत सम्भार हुँदै गर्दा त्यसपछिका अर्थमन्त्री सुरेन्द्र पाण्डेको पालामा उद्योग बन्द गर्ने निर्णय गरिएको थियो ।
नेपाल सरकारको पूर्ण स्वामित्वमा रहेको हेटौंडा कपडा उद्योग २०५७ सालदेखि बन्द छ ।आर्थिक अभियान दैनिकमा खबर छ ।
२०३५/३६ देखि व्यावसायिक रूपमा उत्पादन शुरू गरेको सो उद्योगको दैनिक ३६ हजार मिटर कपडा उत्पादन गर्नसक्ने क्षमता छ । २०३६ सालमा चीन सरकारले बनाइदिएको सो उद्योग ७ सय रोपनी क्षेत्रफलमा फैलिएको छ । करीब २० करोड रुपैयाँ लगानीमा स्थापना गरिएको उक्त उद्योगमा १ हजार २ सय जनाले रोजगारी पाएका थिए । उद्योगमा १४ हजार ६ सय ६८ ओटा धागो काट्ने मेशिन, ४ सय ८६ ओटा तानलगायत रङ्गाइ छपाइका मेशिन रहेका छन् । त्यस्तै, केही लुङ र स्पिनिङ मेशिनसमेत उक्त उद्योगमा अझै बाँकी छन् ।
प्रकाशित मिति: १० आश्विन २०७३, सोमबार ०७:५४
