काठमाडौँ, ९ असोज । माओवादी केन्द्रनिकट पत्रकारहरुको संगठन प्रेस सेन्टरमा चुनावी सरगर्मी बढेको छ ।
असोजको १३ र १४ गते हुने सेन्टरको प्रथम महाधिवेशनका लागि उम्मेदवारहरुले आफ्नो पक्षमा जनमत बढाउन लबिङ थालेका छन् । अध्यक्षका लागि ओम शर्माको दौडधुप निकै देखिन्छ । उनी माओवादी केन्द्र अध्यक्ष पुष्पकमल दाहाल पहिलोपटक प्रधानमन्त्री हुँदा प्रेस सल्लाहकारको भूमिका निभाइसकेका व्यक्ति हुन् । उनी चुनावीभन्दा पनि सर्वसम्मत बन्ने प्रयासमा जुटेका छन् ।
तर, शर्मालाई सर्वसम्मत हुन गाह्रो देखिन्छ । किनभने, यसअघि पनि संगठनको नेतृत्व गरिसकेका कारण शर्मालाई नयाँ पुस्ताका पत्रकार नेताहरु थाम्ने प्रयासमा लागेका छन् ।
यस्ता छन् सेन्टरका उम्मेदवार
अध्यक्षमा ओम शर्मा, बलराम थापा, विष्णु सापकोटा र दीपक मैनाली, उपाध्यक्षमा लोकप्रसाद बन्जरा, सुरेशचन्द्र अधिकारी, महासचिवमा सचिन रोका, मनोज घर्तीमगर, दयानिधि भट्ट, राजु लामा, सचिवमा लक्ष्मण खड्का, गणेश भारती, राजेश चाम्लिङ, विवेक गौतम, पहल साउद र कोषाध्यक्षमा रोशन खड्का चर्चामा छन् ।
सेन्टरको अहिलेको विधानअनुसार ७ सचिव र वरिष्ठसहित ३ उपाध्यक्ष, १ कोषाध्यक्ष र १ महासचिव निर्वाचित हुने व्यवस्था छ ।
प्रकाशित मिति: ९ आश्विन २०७३, आईतवार २०:४८
