काठमाडौं, ५ असोज । बुधबारदेखि सुरु भएको नेकपा एमालेको केन्द्रीय कमिटी बैठकमा उपमहासचिव घनश्याम भुसालले फरक दस्तावेज प्रस्तुत गरेका छन् । अध्यक्ष केपी शर्मा ओलीले तयार पारेको राजनीतिक प्रतिवेदनमा असहमति जनाउदै भुसालले २६ पृष्ठ लामो फरक दस्तावेज प्रस्तुत गरेका हुन् ।
अध्यक्ष ओलीले ३२ पृष्ठ लामो राजनीतिक दस्ताबेज तयार गरेका थिए । भुसालले आफ्नो दस्ताबेजलाई पार्टीभित्रको गुट अन्त्य गर्ने कार्यदिशा मात्र भएको बताएका छन् । यद्यपि भुसाल आफैमा बरिष्ठ नेता माधवकुमार पक्षधर मानिन्छन् ।
गुटबन्दीले पार्टी कमजोर बन्दै गएको भन्दै भुसालले अध्यक्ष ओलीको दस्ताबेजमा आफ्नो असहमति राखे पनि दस्ताबेजको बैचारिक तथा सैद्धान्तिक कुराहरुहमा भने खासै फरक नरहेको एक एमाले नेताले बताए ।
नेता भुसालले आफ्नो राजनीतिक दस्ताबेजमा गुटबन्दीको समस्यालाई प्राथमिकता दिँदै गुटबन्दी अन्त्यका उपायसमेत सुझाएका छन् । उनले नेकपा एमाले नेपालको सबैभन्दा बढी संगठित दल भएको दाबी गर्दै यस दलले गुटबन्दी अन्त्य गर्न चाहे अन्त्य हुन सक्ने ठोकुवा गरेका छन् । उनले पटक पटकका बैठकहरुमा गुटबन्दी अन्त्यको निर्णय हुने गरेको तर कार्यान्वयन नहुने समस्या रहेको औंल्याएका छन् ।
त्यस्तै भुसालले पार्टी क्रान्तिका लागि स्थापना भएको र क्रान्तिका लागि सक्षम पनि भएको भन्दै शासकीय पद्धतिमा पार्टी कमजोर रहेको दृष्टिकोण आफ्नो दस्ताबेजमा राखेका छन् । उनले पार्टी अब शासन, विकास तथा निर्माणमा लाग्नु पर्ने समय आएको आफ्नो दस्ताबेजमा उल्लेख गरेका छन् ।
उनले पार्टीको नबौँ महाधिवेशनका क्रममा पार्टीले गरेका विभिन्न निर्णयहरु अहिलेसम्म कार्यान्वयन नभएको भन्दै ती निर्णयहरुलाई संस्थागत रुपमा कार्यान्वयन गरी अघि बढ्न आफ्नो फरक दस्ताबजेमार्फत नेतृत्वलाई सुझाएका छन् । उनले पार्टीका हरेक समस्याहरुको समाधान गुटबन्दीको अन्त्यबाटै हुने उल्लेख गरेका छन् ।
प्रकाशित मिति: ५ आश्विन २०७३, बुधबार १५:०९
