काठमाडौ १८ साउन – शेयरबजारको कुल कारोबार रकममध्ये वाणिज्य बैङ्कको हिस्सा बढ्न थालेको छ । गत साताको कुल कारोबार रकममध्ये वाणिज्य बैङ्कको अंश करीब साढे ५२ प्रतिशत थियो भने चालू सातामा पनि त्यस्तै भइरहेको छ । सोमवारदेखि बिहीवारसम्म भएको कारोबार रकममध्ये उक्त अंश वाणिज्य बैङ्कको देखिएको हो ।
साप्ताहिक कारोबारका लागि ४ दिनमात्र खुलेको बजारमा करीब साढे ९ अर्ब रुपैया“बराबरको शेयर किनबेच भएको थियो । गत साताको आइतवार शेयर किनबेच भएन । ब्रोकर कम्पनीहरूको कारोबार प्रणालीमा परिमार्जित कमिशन अद्यावधिक गर्न नभ्याइएकाले सो दिन शेयर कारोबार नभएको हो । बा“की दिनहरूमा सबैभन्दा धेरै वाणिज्य बैङ्कको शेयर किनबेच भएको हो ।आर्थिक अभियान दैनिकमा खबर छ ।
गत साताजस्तै चालू साताको २ व्यापार दिनमा पनि वाणिज्य बैङ्कको शेयरमै लगानीकर्ता बढी आकर्षित भएको देखिन्छ । आइतवार र सोमवारको कारोबार हेर्ने हो भने पनि सर्वाधिक शेयर कारोबार भएका कम्पनीमध्ये यही समूह अग्रस्थानमा रहेको छ । तर, शेयर सङ्ख्याका आधारमा सबैभन्दा अघि सामूहिक लगानीकोष छ । गत साता किनबेच भएका कुल धितोपत्र सङ्ख्यामा यो समूहको अंश ५६ दशमलव ८१ प्रतिशत छ । सामूहिक लगानीकोषको प्रतिएकाइ (युनिट) अङ्कित मूल्य १० रुपैयाँ हुने भएकाले धितोपत्र सङ्ख्या बढी देखिएको हो । त्यसपछि दोस्रोमा मात्र वाणिज्य बैङ्क छ । किनबेच भएका कुल शेयर सङ्ख्यामध्ये वाणिज्य बैङ्कको अंश २१ दशमलव २४ प्रतिशत छ । सो अवधिमा वाणिज्य बैङ्कहरूको ५४ लाख ६४ हजार ८ सय १२ कित्ता शेयर किनबेच भएको छ ।
हाल २८ ओटा वाणिज्य बैङ्क सञ्चालनमा छन् । तीमध्ये मर्जरका कारण केही बैङ्कको शेयर कारोबार बन्द छ । बाँकी २०/२१ ओटा बैङ्कको शेयरमात्र किनबेच हुँदै आएको छ । बजारमा आधाभन्दा धेरै शेयर यही समूहको छ । हाल नेप्सेमा २ सय ३२ ओटा कम्पनी सूचीकृत छन् । तीमध्ये बैङ्क तथा वित्तीय संस्था र बीमासमूहको अंश करीब ८५ प्रतिशत छ । गत साताको व्यापारमा वाणिज्य बैङ्क, विकास बैङ्क, वित्त कम्पनी र बीमासमूहको अंश जोड्दा ८८ दशमलव ७६ प्रतिशत हुन आउँछ । यसले पनि शेयरबजारमा वित्तीय संस्था र बीमासमूहअन्तर्गत कम्पनीको प्रमुख भूमिका रहेको प्रमाणित गर्छ ।
गत साताको व्यापारमा वाणिज्य बैङ्कपछिको अंश विकास बैङ्क र बीमासमूहको छ । गत साताको कुल कारोबारमा विकास बैङ्क समूहको अंश साढे १५ प्रतिशत र बीमासमूहको अंश करीब १५ प्रतिशत छ । यसैगरी, वित्तसमूहको अंश ५ दशमलव ८९ प्रतिशत, जलविद्युत्को ४ दशमलव ६६ प्रतिशत र होटेलको १ दशमलव ३३ प्रतिशत छ । यसअतिरिक्त संस्थापक समूहको साढे २ प्रतिशत, सामूहिक लगानीकोषको करीब साढे २ प्रतिशत र उत्पादन तथा प्रशोधनको शून्य दशमलव शून्य ६ प्रतिशत भएको नेप्सेको तथ्याङ्कमा उल्लेख छ ।
प्रकाशित मिति: १८ श्रावण २०७३, मंगलवार ०७:२५
