काठमाडौँ, १७ साउन – राष्ट्रपति विद्यादेवी भण्डारीले राजनीतिक सहमतिका आधारमा प्रधानमन्त्रीको निर्वाचनका लागि दिएको सात दिनको समयमा सहमति नजुटेपछि अब प्रधानमन्त्रीको निर्वाचन बहुमतीय प्रक्रियाबाट हुने भएको छ ।
दलका शीर्ष नेताहरूले आइतबार राष्ट्रपतिसँग भेट गरी राजनीतिक सहमतिका आधारमा सरकार गठन हुन नसक्ने जानकारी गराउनुभएको छ । भेटमा राष्ट्रपति भण्डारीले दलहरूबीच सहकार्य र मेलमिलापबाटै अगाडि बढ्न जोड दिनुभएको छ । गोरखापत्र दैनिकमा खबर छ ।
राष्ट्रपतिबाट नेपालकोे संविधानको धारा २९८ को (२) राजनीतिक सहमतिका आधारमा प्रधानमन्त्रीको निर्वाचन गर्न व्यवस्थापिका–संसद्मा क्रियाशील दलहरूलाई गरिएको आह्वानको एक साता बितेको छ । राजनीतिक सहमतिको प्रयास सफल नभएपछि अब संविधानको सोही धाराको उपधार (३) अनुसार बहुमतीय प्रक्रियाबाट प्रधानमन्त्रीको निर्वाचन हुने पक्का भएको हो ।
यस प्रयोजनका लागि राष्ट्रपति कार्यालयले सम्भवतः सोमबार दिउँसोसम्म संसद् सचिवालयलाई पत्राचार गर्नेछ । सोमबार अपराह्न ३ बजे बस्ने संसद्को बैठकमा राष्ट्रपति कार्यालयको पत्र पढेर सुनाइनेछ । त्यसपछि बहुमतीय प्रक्रियाबाट निर्वाचन गराउन संसद्का महासचिव मनोहरप्रसाद भट्टराईलाई निर्वाचन अधिकृत तोक्ने र निर्वाचन कार्यक्रम प्रकाशित गर्न निर्देशन दिने सम्भावना छ ।
संसद् सचिवालयका एक उच्च अधिकृतले दिएको जानकारी अनुसार सोमबार सभामुख ओनसरी घर्तीले दलका शीर्ष नेताहरूसँग छलफल गरेपछि मात्रै यसको टुङ्गो लाग्नेछ । नेकपा (माओवादी केन्द्र)का नेता एवं पूर्वअर्थराज्यमन्त्री हरिराज खेवाको निधनको शोक प्रस्ताव पारित मात्रै गरेर संसद् स्थगित गर्ने वा संसद्का अन्य कारबाही पनि अगाडि बढाउने भन्ने तय हुनेछ ।
शोक प्रस्तावसहित अन्य कारबाही अगाडि बढेमा साउन १८ मा प्रधानमन्त्रीको उम्मेदवारी दर्ता र १९ गते निर्वाचन हुनेछ । यदि सोमबार संसद् बैठकले शोक प्रस्ताव मात्रै पारित गरेर संसद् स्थगित भएमा १९ गते प्रधानमन्त्रीको उम्मेदवारी दर्ता र २० गते निर्वाचन गर्ने संसद् सचिवालयको तयारी रहेको छ ।
प्रकाशित मिति: १७ श्रावण २०७३, सोमबार ०७:०६
