सुर्खेत ९ साउन । मध्यपश्चिमाञ्चल विश्वविद्यालयको दीर्घकालीन शैक्षिक रुपान्तरण बिषयमा श्रावण तिन दिने ग्रिष्मकालिन सम्मेलन आइतबार सुरु भएको छ । सम्मेलनको मध्यपश्चिमाञ्चल विश्वविद्यालयका उपकुलपति प्रा.डा. उपेन्द्र कुमार कोइरालाले उदघाटन गरे ।
उक्त उदघाटन कार्यक्रममा उपकुलपति प्रा.डा. कोइरालाले मध्यपश्चिमाञ्चल विश्वविद्यालयलाई अन्तर्राष्ट्रियकरण गर्न र शैक्षिक, प्राज्ञिक पक्षलाई विकास गर्न अमेरिकास्थित विश्वविद्यालयमा प्राध्यापनरत बिज्ञहरूद्वारा सहजीकरण गरिने बताए । उनले तीन दिने सम्मेलनले विश्वविद्यालयका पदाधिकारीहरु, प्राध्यापकहरू, कर्मचारी र विद्यार्थीहरूको शैक्षिक, प्राज्ञिक र प्रशासनिक रूपमा रुपान्तरण गर्न सहयोगी हुने विश्वास व्यक्त गरे |
सम्मेलनमा स्टुनिब्रुक विश्वविद्यालय अमेरिकाका प्राध्यापक डा. जिनी हेमन्ड, डा. नोबुहू नागासावा र डा. श्याम शर्मा, लुजियाना विश्वविद्यालय अमेरिकाका डा. कृष्ण बिष्ट र क्यालिफोर्निया स्टेट विश्वविद्यालय अमेरिकाका डा.सन्तोष खडका सहितको टोलीको सहभागिता रहेको विश्वविद्यालयका सूचना अधिकारी विष्णु कुमार खड्काले जानकारी दिए |
सहजीकरणकर्ताहरूको तर्फबाट डा. श्याम शर्माले नेपालको उच्च शिक्षाको विकासलाई युग अनुकुल बनाउन र नयाँ विश्वविद्यालयहरूको विशिष्ट पहिचान बनाउन यस्ता शैक्षिक सम्मलेनहरूले महत्त्वपूर्ण भूमिका निर्वाह गर्ने विश्वास व्यक्त गरे |
त्यसैगरी रजिष्ट्रार डा. महेन्द्र कुमार मल्लले सम्मेलनले विश्वविद्यालयको साख र गरिमा उच्च बनाउन सहयोगी हुने धारणा व्यक्त गरे |
मध्यपश्चिमाञ्चल विश्वविद्यालयका पदाधिकारीहरु, शिक्षक, कर्मचारीहरू र विद्यार्थीहरूको सहभागिता हुने उक्त तिन दिने सम्मेलनमा शैक्षिक प्राज्ञिक, प्रशासनिक र अनुसन्धान र प्राज्ञिक लेखनका क्षेत्रमा कार्यपत्रमा छलफल भएको थियो |
प्रकाशित मिति: ९ श्रावण २०७३, आईतवार २०:१७
