काठमाडौँ । राष्ट्रिय प्रजातन्त्र पार्टीले हिन्दू राष्ट्रकोपुनः स्थापनाका लागि समान विचार भएका दलसँग सहकार्य गर्ने भएको छ ।
पार्टीको केन्द्रीय कार्यसमितिको बैठकले देशलाई हिन्दू राष्ट्रको रुपमा पुनः स्थापना गर्न निरन्तर सङ्घर्ष गर्ने निर्णय गर्दै हिन्दू राष्ट्रको पक्षमा हुने सबै गतिविधिमा धार्मिक सङ्घसंस्था र जनसमुदायलाई सहयोग गर्न आग्रह गरेको छ ।
पहिलो चरणको कार्यक्रमको अनुभव र जनताको भावनालाई दृष्टिगत गर्दै दोस्रो चरणको सङ्घर्षलाई प्रभावकारी बनाउन वरिष्ठ उपाध्यक्ष बुद्धिमान तामाङको संयोजकत्वमा महामन्त्रीद्वय राजेन्द्र लिङ्देन, डा धवलशम्शेर राणा, भाष्कर भद्रा, प्रदेश नं ३ कार्यसमितिका अध्यक्ष विक्रमबहादुर थापा, महिला सङ्गठनकी अध्यक्ष कुन्तीकुमारी शाही र युवा सङ्गठनका अध्यक्ष प्रकाश रिमाल सदस्य रहेको कार्यदल गठन गरेको छ । उक्त कार्यदलले सात दिनभित्र कार्ययोजना पेश गर्ने पार्टीले जनाएको छ ।
गत फागुन ७ गतेदेखि शुरु गरेको जनसङ्घर्षका क्रममा मेची महाकाली १५ दिने राष्ट्रिय स्वाभिमान यात्रा, हिन्दू राष्ट्रका लागि देशव्यापी हस्ताक्षर सङ्कलन अभियान, सङ्घ, प्रदेश र सबै जिल्लाका प्रशासन कार्यालयमा धर्नालगायत कार्यक्रम सफल भएको निष्कर्ष बैठकले निकालेको छ ।
यसैबीच राप्रपा (संयुक्त) का नेता सुन्दर पाण्डेले हिन्दू राष्ट्रको पुनः स्थापना, सङ्घीयताबारे जनमतसङ्ग्रह, भ्रष्टाचारको अन्त्य, मूल्यवृद्धि नियन्त्रणलगायत माग गरी यही वैशाख अन्तिम सातादेखि देशव्यापी अभियान शुरु गर्ने जानकारी दिए ।
प्रकाशित मिति: ९ बैशाख २०७६, सोमबार ०७:१८
