सुर्खेत, ८ जेठ । गृहमन्त्री रामबहादुर थापाले नेपालको विकास र समृद्धि मुख्य लक्ष्य भएको बताएका छन् । विकासका लागि सुशासन अपरिहार्य छ भन्दै गृहमन्त्री थापाले सुशासन बिना विकास सम्भव नहुने कुरामा जोड दिए ।
कर्णाली प्रदेशको सुरक्षा गोष्ठी उद्घाटन गर्न मंगलवार सुर्खेत आइपुगेका गृहमन्त्री थापाले सञ्चारकर्मीहरुसंग कुरा गर्दै सिन्डिकेट र भ्रष्टाचार उन्मुलन नगरेसम्म मुलुकमा विकास र समृद्धि नआउने बताए ।
गृहमन्त्री थापाले विकास र समृद्धिका लागि सरकारले सबैखाले सिण्डिकेट हटाउने बताए । उनले भने ‘सिण्डिकेटका कारण पनि देश पछि परेको हो’ । मन्त्री थापाले पछिल्लो समयमा लागुऔषधका घटना बढ्दै गएकाले लागूऔषधलाई कडाइका साथ निषेध गरिने बताए ।
‘शान्ति सुरक्षा, विकास निर्माण, अपराध, घरेलु हिंसाको कारक लागू औषध बनेको छ’ गृहमन्त्री थापाले भने, ‘लागू औषध प्रयोगकर्ता र विक्रीकर्तालाई कडा कारवाही गर्ने र उक्त सञ्जाललाई नामेट पार्दै शान्ति सुरक्षालाई सुदृढ पारी छोडछौं ।’ उनले जस्तो सुकै हालतमा पनि लागु औषध निषेध गर्ने र मदिरालाई नियन्त्रण गर्ने बताए ।
गृहमन्त्री थापाले सुन प्रकरणका आरोपी, सुन तस्कर चुडामणी उप्रेति ‘गोरे’ लाई सरकारले पक्राउ गर्न सफल भएको बताए । सुन तस्करीको सञ्जाललाई भत्काउन र निष्तेज पार्न सरकार सफल हुने उनले बताए ।
गृहमन्त्री थापाले नेपालमा राजनीतिक अतिवादीबाट सुरक्षा चुनौति रहेको बताए । उनले भने ‘विप्लव समूह, तराईमा रहेका भूमिगत केही समूह र सीके राउतबाट सुरक्षा चुनौति छ ।’ गृहमन्त्री थापाले सरकारले सबै चुनौतीको सामना गर्दै देशलाई विकास र समृद्धिको बाटोमा लिन सक्षम हुने कुरामा जोड दिए ।
गृहमन्त्री थापाले ठेकेदारहरुलाई नियमन गर्ने निकाय भौतिक योजना तथा निर्माण मन्त्रालय भएपनि मजदुरहरुको पैसा खाएर भागेका, समयमै काम नसक्ने र गुणस्तरहीन काम गर्ने जो कोहीलाई पनि सरकारले कानुन बमोजिम कार्वाही गर्ने समेत चेतावनी दिए ।
प्रकाशित मिति: ८ जेष्ठ २०७५, मंगलवार १६:५८
