सुर्खेत, २१ माघ । प्रदेश नं. ६ मा माघ २९ गते सभामुखको चुनाब हुने तय भएको छ । आइतबार वीरेन्द्रनगरमा सम्पन्न पहिलो प्रदेशसभा बैठकले माघ २९ गतेकाे लागि सभामुखको निर्वाचनको मिति तय गरेको हो ।
बैठकमा प्रदेशसभामा उपस्थित दलका नेताहरुले सम्बोधन गरेका थिए । बैठकमा बोल्ने नेताहरुले प्रदेश ६ लाई समृद्ध बनाउनुपर्ने र गरिबी, अशिक्षा, जस्ता लगाएतका कुराहरु अन्त्य गर्नुपर्ने प्रतिबद्धता जाहेर गरेका थिए ।
बैठकमा भाग लिँदै नेकपा (एमाले) का यामलाल कंडेलले जनताले राजनीतिक स्थिरता, समृद्धि, सुशासन र न्यायका लागि जनादेश दिएकाले इमान्दारिता र जवाफदेहिताका साथ अघि बढ्न आग्रह गरेका छन् । उनले प्रदेश नं ६ लाई नमूना बनाउन सबै एकजुट भएर लाग्नुपर्नेमा जोड दिए । उनले प्रदेश ६ का ४० जना जनप्रतिनिधिहरुले जनताको अमुल्य भोटलाई सम्झेर आफ्नो कर्तव्य पालना गर्नुपर्ने आग्रह गरे । उनले यस प्रदेशका १० वटै जिल्ला हेर्ने र घुम्ने लायक हुँदा पनि यसको सही सदुपयोग नहुँदा प्रदेश ६ पछाडि परेको गुनासो गरे ।
नेकपा (माओवादी केन्द्र) का महेन्द्र बहादुर शाहीले मुलुकको परिवर्तनका लागि पटक–पटक भएका आन्दोलन र प्राप्त उपलब्धिको रक्षा गर्दै आर्थिक विकासका लागि सबै लाग्नुपर्ने बताए ।
नेपाली कांग्रेसका जिवन शाहीले प्रदेश ६ लाई समृद्ध बनाउने सबै जनप्रतिनिधिहरुको दायित्व रहेको भन्दै यस प्रदेशमा पर्यटन स्थल, जडिबुटी, अर्गानिक खाद्यान्न प्रशस्त मात्रामा भएपनि यसलाई सही सदुपयोग गर्न नसकिएकाले प्रदेश ६ पछाडि परेको बताए ।
राप्रपाकी सुशिला शाहीले अरु प्रदेश भन्दा प्रदेश ६ कमजोर र धेरै गरिबीमा पिल्सिएकाले यो समस्यालाई छिटो भन्दा छिटो सबै जनप्रतिनिधि मिलेर सुल्झाउनु पर्ने बताइन् । उनले राजनीतिक परिवर्तनको खोजीमा मुलुकले लामो समय व्यतित् गरे पनि नयाँ संविधान प्राप्त भइसकेकाले अबको समय सहभागितामूलक लोकतन्त्रलाई व्यवहारमा उतार्न जोड दिइनुपर्ने बताइन् ।
बैठकले प्रदेशसभा सञ्चालन नियमावली नबनेसम्मका लागि दलीय सहमतिका आधारमा तयार गरिएको प्रदेशसभा कार्यसञ्चालन अन्तरिम कार्यविधि, २०७४ लाई सर्वसम्मतिले पारित गरेको छ ।
प्रकाशित मिति: २१ माघ २०७४, आईतवार १६:०७
