नयाँ दिल्ली, भारत, १६ पुस (रासस/सिन्ह्वा) । प्रधानमन्त्री मोदीले आफ्नो नेतृत्वको सरकारले मुसलमान महिलालाई हजमा जाने विषयमा ठूलो कदम चालेकोे बताएका छन् ।
मासिक रूपमा हुने प्रधानमन्त्रीको रेडियो सम्बोधन, मन कि वातको ३९ औँ श्रृङ्खलामा प्रधानमन्त्रीले मोदीले भने, “मुसलमान महिलाले हजमा जान कुनै अनुमति लिनु पर्ने छैन । चाहेको खण्डमा उनीहरूले हजमा जान स्वतन्त्र रहने छन् । यसका लागि सरकारले धेरै बिषयमा काम गरेको छ ।”
प्रधानमन्त्री मोदीले भने, “मैले जम्मू तथा काश्मिरमा केही त्यस्ता छोरीहरूलाई भेटेँ, जसको उत्साह देखेर म चकित बनेको छु । आतङ्कबादी गतिविधिले सङ्कटग्रस्त बनाएको क्षेत्रका युवामा यस किसिमको उत्साह देखिनु सकारात्मक कुरा हो ।”
भारतीय प्रधानमन्त्री नरेन्द्र मोदीले जम्मु तथा काश्मिरमा द्वन्द्वका कारण घर गुमाएका २७ बर्षीय युवा अन्जुम बासिर खानले यस बर्ष भारतीय सरकारी सेवामा पाएको सफलतालाई दिलैदेखि प्रशंसा गरे ।
उनले भने, “अन्जुम जम्मु तथा काश्मिरको लागि मात्र होइन सम्पूर्ण भारतका लागि प्रेरणाको स्रोत हुनुभएको छ ।”
उनले थपे, “बासिर खानको प्रेरणादायी कथा मैले आज मात्र थाहा पाए । आतङ्कवादको पीडा तथा घृणाको शिकार बनेका खानले काश्मिरको प्रशासनिक परीक्षामा सर्वोत्कृष्ट स्थान हाँसिल गर्नुभयो । आज उहाँ सवैको लागि प्रेरणाको स्रोत हुनुभएको छ ।”
प्रकाशित मिति: १६ पुष २०७४, आईतवार १९:१४