उम्मेदवार छान्न यस्ताे बन्दैछ कांग्रेसकाे मापदण्ड -

काठमाडौ २ असोज । कांग्रेसले प्रतिनिधिसभा र प्रदेशसभाका उम्मेदवार छनोटको मापदण्डबारे छलफल सुरु गरेको छ । असोज १५ भित्र उम्मेदवारको सूची केन्द्रमा आउने गरी पार्टीको स्थानीय तहबाट उम्मेदवारहरूको सिफारिस माग गर्ने निष्कर्ष बैठकले निकालेको छ । गाउँ, नगर कार्य समितिको सुझावका आधारमा क्षेत्रीय कार्यसमितिले सिफारिस गरेका उम्मेदवारलाई जिल्ला कार्यसमितिले रायसहित केन्द्रमा पठाउने प्रचलन छ । त्यसरी आएका नामावली माथि केन्द्रीय कार्यसम्पादन समितिमा छलफल गरी निर्णय लिइन्छ । यसपटक पनि त्यही प्रचलनअनुसार उम्मेदवारको सूची माग गर्ने तयारी कांग्रेसले गरेको छ । तर, उम्मेदवार सिफारिस गर्दा जथाभावी हुन सक्ने भन्दै केन्द्रीय कार्यसम्पादन समितिले सिफारिस गर्दा अपनाउनुपर्ने मापदण्ड भने तोक्ने भएको छ । कस्तो मापदण्ड तोक्ने भन्नेबारेमा सोमबारको बैठकमा प्रस्ताव ल्याइने भएको छ । त्यसका लागि पार्टी सभापति शेरबहादुर देउवाले वरिष्ठ नेता रामचन्द्र पौडेलसहितका नेतालाई जिम्मा दिएका छन् । देउवा संयुक्त राष्ट्रसंघको महासभामा भाग लिन अमेरिका जानुअघि नै मापदण्डअनुसार उम्मेदवार सिफारिसका लागि तल्लो तहलाई निर्देशन पठाउने तयारी कांग्रेसले गरेको हो । प्रतिनिधिसभा र प्रदेशसभाको चुनाव एकैपटक आगामी मंसिर १० र २१ गतै हुँदै छ । हिमाली र उच्च पहाडी जिल्लामा हुने पहिलो चरणको चुनावका लागि कात्तिक ५, दोस्रो चरणका लागि कात्तिक १६ मा मनोनयन कार्यक्रम छ । समानुपातिकतर्फका उम्मेदवारको बन्द सूची भने असोज २९ गते नै निर्वाचन आयोगमा बुझाउनुपर्छ ।

कांग्रेसले प्रत्यक्षतर्फ मात्रै नभएर समानुपातिकतर्फ समेत उम्मेदवारको सूची क्षेत्रीय कार्यसमितिकै सिफारिसमा जिल्ला कार्यसमितिबाटै माग गर्ने भएको छ । ‘समयले च्याप्दै गएको र प्रधानमन्त्रीसमेत बाहिर जाने भएकाले उम्मेदवारको सिफारिसका लागि छलफल सुरु भएको हो,’ पार्टी नेता अर्जुननरसिंह केसीले भने, ‘सिफारिस गर्ने आधारहरूका बारेमा विशेष रूपमा छलफल भएको छ ।’ बैठकमा बोल्ने अधिकांशले अबका चुनावमा पार्टी भावनात्मक रूपमै एक भएर उत्रनुपर्ने बताएका थिए । पार्टीभित्रको भागबन्डा नमिल्दा उत्पन्न हुने असन्तुष्टिले स्थानीय तहमा कांग्रेस दोस्रो स्थानमा पुगेको बताउँदै नेताहरूले त्यसको अन्त्यका लागि स्थानीय तहमा उम्मेदवार छनोट गर्दा भएका गल्ती दोर्‍याउन नहुनेमा जोड दिएका थिए । पार्टीभित्रको विवादलाई आन्तरिक रूपमै छलफल गरी पार्टीभित्र बृहत् एकताको सन्देश दिनुपर्नेमा पनि नेताहरूले जोड दिएका छन् ।

प्रकाशित मिति: २ आश्विन २०७४, सोमबार ०७:४५

प्रतिक्रिया दिनुहोस्