पर्सा, ११ भदौ । शहरी विकासमन्त्री प्रभु साहले दण्ड र पुरस्कारको नीतिलाई कार्यान्वयनमा नल्याएका कारण सरकारी परियोजना समयमा पूरा हुन नसकेको बताएका छन् ।
शहरी विकास मन्त्रालयले आज वीरगञ्जमा आयोजना गरेको अन्तरक्रिया कार्यक्रमलाई सम्बोधन गर्दै मन्त्री साहले गुणस्तरीय र समयमा परियोजनाको काम पूरा गर्ने ठेकेदार वा परियोजनासँग जोडिएका सरकारी कर्मचारीलाई पुरस्कृत गर्ने र समयमा काम पूरा नगर्नेलाई छानबिन गरी दण्डित गर्ने परिपाटीको विकासमा मन्त्रालय लागेको जानकारी दिए ।
उनले ठेक्का सकार गर्ने र वर्षाँैसम्म काम पूरा नगरी लट्काइराख्ने परिपाटीको अन्त्यका लागि अब सरकार कठोर कदम चाल्ने तयारीमा रहेको बताउँदै उनले अब रुग्ण परियोजनाको छानबिन गरी ठेकेदार अथवा सरकारी कर्मचारी जो दोषी देखिन्छन्, तिनलाई कारबाही हुन्छ भने ।
प्रत्येक जिल्लामा सञ्चालित सरकारी परियोजनाबारे सर्वसाधारणलाई जानकारी गराउन कार्यालय प्रमुखलाई मन्त्री साहले निर्देशन दिए ।
सरकारद्वारा सञ्चालित जनता आवास कार्यक्रममा अनुदान रकमलाई रु दुई लाख ३६ हजारबाट बढाएर रु तीन लाख ५० हजार पुर्याइएको मन्त्री साहले जानकारी दिए । उनले कार्यक्रममा लाभग्राहीको रकम हिनामिना भएका गुनासा आएपछि सरकारले अनुदान रकम सोझै लाभग्राहीको खातामा जम्मा गर्ने व्यवस्था मिलाएको बताए ।
मन्त्री साहले बारा, पर्सा र रौतहट जिल्लामा सञ्चालित परियोजना रुग्ण अवस्थामा रहेको तथ्यांकले देखाएको र यसैको कारण पत्ता लगाउन मन्त्रालयको टोलीसहित स्थलगत अनुगमनमा आएको बताए ।
कार्यक्रममा वीरगञ्ज उद्योग वाणिज्य संघका अध्यक्ष ओमप्रकाश शर्माले वीरगञ्जवासीले भोग्नुपरेको सडक तथा ढलका समस्याबारे जानकारी दिए। उनले वीरगञ्जमा सञ्चालित एडिबी परियोजनाको काम सकारले गरेका ठेकेदारले समयमा काम पूरा नगरेको र नगर क्षेत्रभरिको सडक प्रयोग बिहीन अवस्थामा पुर्याएका कारण नगरवासीले भोगेको पीडाबारे मन्त्री साहलाई अवगत गर्दै समस्याको चाँडै समाधान गराइदिन आग्रह गरेका थिए ।
अन्तक्र्रियामा सहभागी ठेकेदारले परियोजनाको काम पूरा भए पनि सम्बन्धित कार्यालयले परियोजना जिम्मा बुझ्न नमानेको, अनैतिक रकम माग गर्दै परियोजनालाई कर्मचारीले लामो बनाउने काम गरेको, भवन डिभिजन कार्यालयबाट परियोजनाको काम सकार गरे पनि जिम्मा बुझ्ने दायित्व जिल्ला जनस्वास्थ्य कार्यालयलाई दिएको र कार्यालयले जिम्मा बुझ्नै नमानेका कारण निर्माण सम्पन्न भए पनि वर्षाँैदेखि भवन प्रयोगविहीन अवस्थामा रहेको जानकारी दिएका थिए ।
कार्यक्रममा शहरी विकास मन्त्रालयका प्रवक्ता रमेशप्रसाद सिंहले देशभरि सञ्चालित परियोजना र त्यसको प्रगतिबारे जानकारी दिएका थिए । शहरी डिभिजन कार्यालय वीरगञ्जका प्रमुख सुरेश वाग्लेले बारा, पर्सा र रौतहटमा सञ्चालित रहेका विकासे परियोजनाको प्रगतिबारे बताएका थिए । रासस
प्रकाशित मिति: ११ भाद्र २०७४, आईतवार १६:१०
