काठमाडौँ, १३ साउन । मुलुक संघीय संरचनामा प्रवेश गरिसकेको अवस्थामा सरकारी र अन्य निकायहरुलाई जवाफदेही र उत्तरदायी बनाउँदै नागरिकको पैरवी क्षमता बढाउन गैरसरकारी संस्थामा कार्यरत सामाजिक कार्यकर्ता र नागरिक समाजका अगुवाको क्षमता अभिवृद्धिमा जोड दिइएको छ ।
अमेरिकी सहयोग नियोग (युएसएड) फेमिली हेल्थ इन्टरनेशनल (एफएचआई ३६०) को सहयोगार्थ नेपाल सहभागीमूलक कार्यसमूह (नेपान)ले राजधानीमा दुई चरणमा पैरवी कौशल र सामाजिक जवाफदेहितासम्बन्धी तालीम कार्यक्रम सञ्चालन गरेको हो ।
नागरिक समाज पारस्परिक जवाफदेहिता परियोजनासँग आबद्ध १९ जिल्लाका १४ वटा गैरसरकारी संघसंस्थाका ४८ जना प्रतिनिधिलाई दुई चरणमा सञ्चालन गरिएको सो तालीममा पैरवी कौशल र सामाजिक जवाफदेहितासम्बन्धी प्रशिक्षण दिइएको थियो ।
पहिलो चरणमा प्रशिक्षकद्वय डा नानीराम सुवेदी र भोला भट्टराईले पैरवी कौशलको परिचय र विकास, पैरवी र सुशासन, पैरवीका चरणहरु, रणनीति, सीप र प्रविधिबारे प्रशिक्षण दिएका थिए भने दोस्रो चरणमा प्रशासकीय अदालतका अध्यक्ष काशीराज दाहाल, मनोजकुमार भट्टराई, गोपाल तामाङ, प्रणव भट्टराई र कर्ण नेपालीले सामाजिक जवाफदेहितासम्बन्धी प्रशिक्षण दिएका थिए ।
तालिम समापनका अवसरमा नेपानका कार्यकारी निर्देशक फटिकबहादुर थापाले संघीय राज्यमा सामाजिक जवाफदेहिता र सुशासनबारे स्थानीयस्तरमा कार्यरत सामाजिक कार्यकर्ताको क्षमता अभिवृद्धिका लागि प्रशिक्षण सञ्चालन गरिएको बताए । रासस
प्रकाशित मिति: १३ श्रावण २०७४, शुक्रबार १३:१९
